للأهداف سحر مثل محاولة (أم قيردون) لبناء عش تحت إحدى الشُّعب التي تظن أن أعين الأطفال إذا وصلتها فإن أيديهم لن تصلها.
كنا صغاراً مغرمين بأم قيردون ـ لا أدري لماذا؟ بعض الحب لا يحتاج إلى فيتامين مبررات، ولا إلى جلوكوز أعذار مستعجل.
إعجابنا بأم قيردون ونحن أطفال لم يكن ناتجاً من فراغ.. كان هذا الإعجاب ناتجاً من الفطرة السليمة، وعندما كبرنا عرفنا أن أم قيردون يمثل (رمزية الطيبة والسلام: يُنظر إلى “أم قيردون” في الثقافة الشعبية كطائر مسالم وجميل، ورؤيته تحلق في أسراب بيضاء فوق الحقول ترتبط دائماً بمواسم الخير، الخضرة، والبركة).
الموضوع ما عندو علاقة بهدف فولمو.
طبنجة عيشتو تطير.
كلمات كتبتها قبل سنوات ونشرتها في صفحة كاملة في قلب الشارع أو نبض الكاريكاتير لا أذكر تحديداً، يحضرني مطلعها الآن وأنا أتحدث عن هدف فولمو في المريخ (يا بنية والناس خيروك بين البحر أو البحر.. اخترت بعد الاجتهاد انت البحر)… ما عارف ليه فولمو اختار التسديد وهذا ليس من عادته.. واختار التسديد الأرضي وهو يفضل التسديد في سقف المرمى، ولماذا فولمو لم يتوغل وفضل أن يلعبها من حيث يقف، مجموعة من (الاجتهادات)، الأكيد أن القيصر اختار أفضلها، لذلك جاء الهدف.
دا ما شغل قاصر.
أعتقد أن (الذكاء الاصطناعي) اشتغل في هذا الهدف؛ لأن جرس كافي حارس المريخ كان صاحياً كالنعسان مثل خالد النعسان في أبوظبي، المباراة ماضية على نهايتها والجميع يتوثب للضربات الترجيحية قام خالد النعسان من نومه وجاب قونو، زي فولمو.
قدر ما قلنا… قدر ما حذرنا، ما بتسمعوا الكلام.
الهلال بلقط في الكأسات من برة وبجيبها تحديداً من المريخ… أي كأس تنافس عليه الهلال والمريخ برة البلد… الهلال فاز بيه.
كأس أبوظبي.. كأس السوبر في دار السلام، نسخة الدوري المختصر.. الدوري الموريتاني.. الدوري الرواندي.
أي بطولة خارجية مع المريخ فاز بيها الهلال.
ويقولوا ليك الزعيم… إذا وصيفنا الداخلي.. سادس الدوري الموريتاني… ثالث الدوري الرواندي زعيم… الهلال يكون شنو؟
لماذا لم يشتك المريخ خالد النعسان بعد قمة أبوظبي؟ من حقكم.. كان عندهم فرصة ذهبية للشكوى، كان ممكن يقولوا في الشكوى أن خالد النعسان كان (نائماً).. ما زلت أذكر عمود مأمون أبو شيبة في خالد النعسان.. انتوا ليه بتعملوا كدا؟
كان تتخدروا وتقدموا شكوى.
ما عارف ليه اتذكرت هدف خالد النعسان الآن… رغم أن الموضوع ما عندو علاقة بهدف فولمو.
طيب خالد النعسان كان نعسان… جرس كافي مالو؟
أبوجا دخل في البرعي.. ناس المريخ قالوا ليك أسبوع ما قادرين يفرزوا أبوجا من البرعي.
اتلخبطوا.
البعمل فيه ياسر مويس دا شغل ما حضاري.
ياسر متعود… القاصر مالو؟
هدف القيصر فولمو أزعم أنه كان له الفضل في أن يجدد ريجكامب عقده لموسم جديد مع الهلال.
قول واحد.
الموضوع تم بسلام.
قلت ليكم أن لهدفه سحراً.
وأزعم بقلب قوي أن الهدف كان سبباً في أن يمدد فولمو عاماً إضافياً في تعاقده مع الهلال.
قول اتنين.
الموضوع تم في منتهى السلاسة.
والأهم من كل ذلك أن ذلك الهدف كان سبباً في تراجع العليقي عن الابتعاد.. احتفالية العليقي وتواجده في المدرجات مع الجماهير واحتفاله بعد ذلك مع السوباط تؤكد تراجعه عن تصريحاته السابقة.
قول ثلاثة.
دا هدف وإلا (شوفوا دنيتنا الجميلة).
هدف فولمو جعلنا نحضر كأس العالم بنفس، لا أعرف كيف يحضر المريخاب مباريات هذه البطولة وكل هدف يمكن أن يذكرهم بهدف فولمو.
قول أربعة.
بقينا نحضر في كأس العالم من غير كرت بي إن سبورت.
وعلينا أن لا ننسى هدف (مزمل لا) في رواندا.
جدع ليك المدافعين متل كبابي الشاي في المناسبة.. كل كباية في بلد.
قالوا ليك البرعي بقوم من النوم يكورك (مزمل لا).
أبوجا وجرس عليهما الاجتهاد أكثر في مادة الجغرافيا والتاريخ والكيمياء والفيزياء والرياضيات واللغة العربية والمعلومات العامة.
غايتو يا المريخاب عندكم حراس.. كتروا ليهم بس الشكاوي.
ما عندكم حل غير الشكاوي.
نوع ديل ساعدوهم بالشكاوي.
ناس المريخ ديل أغرب ناس… يفوز أي فريق يقدموا (التهاني)، يفوز الهلال يقدموا (الشكاوي).
شغالين… تهاني وشكاوي… بصراحة أتعبتوا معاكم مكتبكم التنفيذي.
قالوا ليك الصفحة الرسمية للمريخ من يوم الهزيمة تاني ما نزلت حاجة.
آخر تحديث… نهاية المباراة.. دوري النخبة.. الهلال (1) المريخ (0).
الكلام دا من يوم الأربعاء.
ما عارف أقول ليكم مريخ الشكاوي أم أقول ليكم مريخ التهاني؟
هدف فولمو جعلنا نشاهد كأس العالم بأريحية شديدة.
صفحات هلالية كثيرة كتبت عن فوز الهلال على المريخ في 10 يونيو 2010م بهدفي مهند الطاهر ومدثر كاريكا.
المفارقة أن الانتصار كان قبل كأس العالم الذي نظمته جنوب أفريقيا بيوم وفازت به إسبانيا.. هل تفوز إسبانيا بهذا الكأس؟
أتوقع ذلك.
وجاء الهلال وفي نفس ذكرى اليوم 10 يونيو وقبل يوم من كأس العالم وفاز على المريخ بهدف فولمو.
عشان تعرفوا نحن أي حاجة عندنا بنظام.
بقول ليكم كدا بتزعلوا.
الغريبة أن الصفحات الهلالية كتبت عن ذلك قبل مباراة القمة الأخيرة.
وناس المريخ ما فهموا الرسالة وما وقعت ليهم.
لكن الأكيد أن المريخ تاني لن يلعب أمام الهلال يوم 10 يونيو قبل كأس العالم بيوم.
ناس محمد حلفا تاني ما بعملوها.
كأس العالم الماضي الذي نظمته قطر كان هو الأجمل في كل نهائيات كأس العالم في التنظيم والتلفزة والاستضافة.
ربما يكون فنياً ليس الأجمل ـ لكن ما عدا ذلك هو الأجمل في كل شيء.
المريخ 6 سنوات ما شاف ليه بطولة، رغم أن المريخ يشارك في الموسم الواحد في دوريين.
تتخيلوا المريخ من قبل كأس العالم الماضي لم يحقق مع الهلال أفضل من الوصافة.
قطر نظمت كأس العالم 2022م.
والأرجنتين فازت بكأس العالم.
ولعبنا تصفيات طويلة والسودان كان قريباً من التأهل للنهائيات.
والمريخ ما عمل أي حاجة.
بالمناسبة في نهائيات كأس العالم الحالية تشارك جنوب أفريقيا وتشارك غانا، والمنتخبين سبق للسودان أن أبعدهما من تصفيات الأمم الأفريقية.. مرة تأهل السودان على حساب جنوب أفريقيا ومرة تأهل السودان على حساب غانا.
ونحن أي حاجة عندنا بنظام.
غانا في كأس العالم وجنوب أفريقيا في كأس العالم.
ممكن نشوف السودان.
الموضوع ما صعب.. ما تصعبوها على روحكم… خاصة بعد أن ارتفع عدد المنتخبات المشاركة في النهائيات إلى 48 منتخباً.
عدد المنتخبات المشاركة في النهائيات رفعوه والمريخ لا جديد يذكر غير شكاوي ترفع ولجان تعين.
ومدرب يقال ومدرب يتم التعاقد معه.
وحكومات تفوت وحكومات تجي.
معقولة الجماعة ديل من كأس العالم الفات أو من قبله (قحف) ما شالوه.
وشابكننا الزعيم يعود.. الزعيم يصل.. الزعيم ينزل الميدان.
ميدان شنو؟ وانتوا بتلعبوا في المكاتب.
وزعامة إيه؟ وانتوا عشمكم كان في أم مغد أكتر من عشمكم في فريقكم.
راجين أم مغد تعطل ليهم الهلال.
والله انتوا غاشين نفسكم غشة كعبة.
ست سنوات لا كأس لا قحف.
الهلال على إحصائية الدكتور علي عصام حقق 9 بطولات متتالية لا يفصل بين هذه البطولات غير شكاوي المريخ.
فضيحة السواد.
ويقولوا ليك الزعيم.
زعيم على مين؟
كرة القدم قوانينها اتغيرت.
وفي حاجات جديدة دخلت.
بقى في حاجة اسمها حكام تقنية الفيديو، انتوا من زمن الحكم بكون قاعد برة في كرسي ما حققتوا ليكم بطولة.
الحاجة الما قادر أفهمها لغاية الآن… أننا في عصر حكام تقنية الفيديو (الفار) تلفزيون السودان (الإعادة) ما قادر عليها.
جهاز إعادة الهدف ما عندنا.
الهدف عندنا من أول نظرة.
تشوف تشوف.. ما تشوف بطريقتك.
ديل الإعادة عندهم أصعب من الاختراع.
نقول عاوزين يعيدوا الجنوب.
عليكم الله ما في زول يقول لي الحرب… عشان موضوع إعادة الهدف ما صعبة.
معقولة ناس الدعم السريع شفشفوا جهاز الإعادة؟
عاوزين بيه شنو؟
يكونوا بحاولوا يعيدوا بيه الرسوم.
الحمد لله النت شبعنا في هدف فولمو.. زمان كنا ننتظر الهدف من الجمعة للجمعة.
أها من الوقت داك المريخ ما حقق ليه بطولة.
زمان كنا ننظر إلى كأس العالم، على أنه شيء بعيد.. الأربع سنوات كانت عمر.. ناس تعرس وناس تموت.. وناس تتخرج من الجامعة وناس تدخل الجامعة وناس تتعين وناس تنزل معاش.
بين كأس العالم وكأس العالم كانت بتحصل حاجات كتيرة.
المريخ من كأس العالم الفات ما شاف ليه بطولة.
الدنيا اتغيرت.. وصافة المريخ وحدها التي لم تتغير.
المنتخبات المشاركة في نهائيات كأس العالم قلت ليكم بقت 48 منتخباً، والمريخ آخر عهوده مع البطولات كان نهائيات كأس العالم يشارك فيها 12 منتخباً.
قلت ليكم الناس ديل من زمن ضربة الجزاء إلا تكون فيها حالة وفاة.
زمن القون إعادته يوم الجمعة في برنامج عالم الرياضة.
معقولة يا مريخاب.. كأس عالم يجي وكأس عالم يفوت وانتوا لغاية الآن ساكين ليكم شكوى.
فضيحة السواد.
أها أقول ليكم كأس العالم القادم لو مد الله في الأعمار ح تكونوا في نفس الحتة.
يمكن كل الذي تفعلونه تضيفوا إلى رصيدكم شكوى جديدة.
الهلال يضيف في البطولات وانتوا تضيفوا في الشكاوي.
وكأس عالم يجي وكأس عالم يفوت والزعيم يعلن الطوارئ للشكاوي.
نادي الهلال للتربية.
نادي المريخ للشكاوي الخاسرة.
….
متاريس
في شندي صعد نادي الكوكب للدرجة الأولى، وصعدت التراجمة للدرجة الثانية.
والكوكب والتراجمة.. الاتنين عندنا معاهما ذكريات وأيام.
ناس مربع واحد عندهم كلام.
مبروك للكوكب والتراجمة.
في الدامر الفريع بطل الدوري.
عطبرة الحاصل فيها شنو؟
بحب أخبار الدوريات المحلية في مدن السودان وبتابع دورياتهم.
بعض الدوريات عندها صفحات نشيطة على مواقع التواصل.
كوستي على مواقع التواصل الاجتماعي ناشطة ودورياتها ما بتسأل في الدوريات الإنجليزية.
عبد العليم مخاوي عمل حيوية كبيرة لصفحة هلال كوستي، وسراج الدين مصطفى عامل شغل كبير عن كوستي في مواقع التواصل الاجتماعي.
من شخصيات كوستي الجميلة الجيلي عبد الخير لاعب المريخ السابق… الجيلي يفترض الاستفادة منه فهو من الشخصيات الراقية والفاهمة.
ومن كوستي محمد يونس المريخي الراقي.
للأسف بسبب الحرب كل هذه الشخصيات اتقطع التواصل معها.
….
ترس أخير: ما تزعلوا كأس العالم القادم بنشوف ليكم شكوى جديدة.. عندنا جنسية طلعت.
مقالات ذات صلة
