عايشين في وكر عصابة (1)

عايشين في وكر عصابة .. اتخيل معاي وإنت في أي حتة في الدنيا وبتقرأ وتتاثر أو تسئ لينا أو تقول ده شنو.

الدنيا ماكلها سواد كده في حاجات سمحة برضو .. العايز اقولوا ليك لا الدنيا كلها سواد ده الأصل والقاعدة الفرح ده بنقلعوا من وسط الحزن.

نضحك أيوه علي روحنا نسخر ونقول مواقف وسط الوجع لمن نقع من الضحك، ونعمل من فسيخ واقعنا شربات.

بنتفاعل قدر قدرتنا مع الدنيا نغالط في الكورة نطعمج ونكاوي نمشي الجنبات نضرب الشيشة.

ونغني ونرقص كمان ونمشي مناسبات ونلعب كورة ونلف في الأسواق، ونشتري ونتباع، ونكتب في السوشال ميديا.

تشوفنا كده تقول الناس دي دنيتهم باسطة دايرين شنو مايحمدوا الله، ماعندنا مشكلة في الحمد والشكر لكن كمان مابنكضب ولا بنجمل حياة ماف والفي بنصنعها نحن.

والصناعة دي جزء من مقاومتنا اليومية عشان نمرق وكر العصابة لحياة حقتنا نحن فيها السلطة والقرار قرارنا.

أواصل.