معليش لسه بظبِّط في طبق المشاعر، الإشارة طاشة، مرة الصورة تبدو لي أم درمان ومرة تبدو لي الدامر.
في ناس قالوا لي دي لا أم درمان ولا الدامر.
قلت ليهم طيِّب دي شنو؟
قالوا لي دي كيجالي.
قلت ليهم الجاب مُـدرّجَــات الهلال في استاد الدامر إلى مُـدرّجَــات استاد أماهورو شنو؟
مالكم عاوزين تجننونا؟
مالكم عاوزين تشككوني.. الطاشي شنو؟ الطبق أم رأسي؟ معقولة بس ـ إذا روفا والغربال والجان، كيجالي والدامر عندهم واحد، الجاب طبنجة شنو في المولودية؟
الجان عندهُ جن أي باك يقابلهُ بحوِّلهُ إلى طبنجة.
ريحة (الكمونية) شمّيناها ـ مصارين باك المولودية طلعت قدامنا ـ أقصد حرقت.
لا أقول ليكم كمونية، لا أقول ليكم أم فتفت.
في ريحة كمونية حرقانة.
والله نحن بنشمها من خامس شارع.
باك المولودية عايز يمشي شمال ويمين في نفس الوقت.. قام إتكوّم في الواطة في حالة يُرثى عليها.
باك المولودية مرة يبقى لي طبنجة ومرة يبقى لي عوض زايد.
قلت ليك الإشارة طشت.
طبنجة ذنبهُ شنو؟
والله الزول دا ما عندهُ أي علاقة بالموضوع.
جان ظهر فجأة في بورتسودان.
ظهر فجأة في الدامر.
ظهر فجأة في كيجالي.
نوع دا يقولوا عليه شنو؟
دا الجن ذاتو.
الحالة دي البلد فيها حظر تجــوال.
وروفا الجمل وجندوز عندهُ واحد.
والغربال هدفهُ لو قعد سنة في الكنبة بنزل يجيبو.
مصاب.. ما مصاب.
بديل.. أساسي.. ولا بتلفت.
في دوري أو ما في دوري، ولا فارقة معاهُ.
وصلاح عادل بالكرت الأحمر نجم المباراة.
وكرشوم بالهدف العكسي أحسن زول.
أصلو ما في مشكلة.
في الدامر أو كيجالي.. عندهم واحد.
قبل ما أدخل ليكم في (صَـابِنَّها)، سمعت لي خبر من بربر.. قالوا مباراة المريخ والإخلاص لم تلعب، عشان الإخلاص انسحب.
قلت ليهم إنتوا متأكدين ان الفريق الذي انسحب هو الإخلاص!!!؟
يمكن الإشارة في بربر تكون برضو طشت.
ناس جان كلود ديل ما عندهم ضمان.
مالكم عاوزين تجننونا؟
