وقت أقول ليكم “نحن أي حاجة عندنا بي نظام” بتنطِّطوا عيونكم زي الأستاذ وقت يدخل الفصل ويقول للطلبة طلِّعوا كراسات الإملاء.
الأيام دُولٌ ـ لفت وجاتنا مقنطرة.
أو مدردقة زي ما قال الحبيب بابكر مختار.
عندما كان تصنيف الهلال في قرعة المجموعات في المستوى الرابع، كان الهلال يقع في مجموعة يكون فيها الأهلي المصري وصن داونز ـ أظن أن ذلك حدث ثلاث مرات ـ القرعة كانت مكشوفة.. الهلال مع الأهلي وصن داونز وأي فريق آخر.
ومرة كان الهلال في مجموعة ضمت إلى جواره الأهلي والترجي التونسي.. واستطاع الهلال التأهل على حساب الترجي.
ومرة مجموعة الهلال كان فيها الأهلي والنجم التونسي.
الحياة كانت صعبة شديد.. أقصد القرعة كانت موت أحمر.. ومجموعة الهلال كانت دائماً هي مجموعة الموت.
الأهلي كان ثابت في مجموعة الهلال وكذلك صن داونز.
شوفوا حكمة الله وعدالة الأيام.. السنة دي قاعدين برانا في المجموعة.. الأهلي في الكونفدرالية وصن داونز خرج من مرحلة التمهيدي.
السنة دي ارتحنا من غلاظة الأهلي ومن شبكة صن داونز.
وقت يقولوا ليكم الهلال رجل صالح ـ بتخلوا شغلتكم وتتفرّغوا للغلاط.
تحبوا الغلاط زي عيونكم.
السنة دي نحن خالفين رِجل على رِجل.. وما عندنا أي مشكلة في القرعة.
أي قرعة معانا ما كعبة.
لكن أنا عشان أحدِّدها معاكم بقول ليكم الفريق الذي أخرج المريخ من التمهيدي سوف يكون إن شاء الله في مجموعة الهلال ـ عاوزين نأخذ تار وصيفنا ـ نحن صعبين حقنا ما بنخليه.
تلف وتجينا.
من هسه نحن حاجزين حوريا الغيني.
والفريق الذي أخرج صن داونز أيضاً سوف يكون في مجموعة الهلال.
جيبوا لينا ويليتي الأنغولي وزِحُّـوا بعيد.
وأي فريق من أندية التصنيف الأول مرحباً به.
ما عندنا أي مشكلة.
الترجي.
نهضة بركان.
الزمالك.
بيراميدز.
حبابهم عشرة.. الهلال كفيلٌ بهم.
السنة دي مجموعتنا هي مجموعة تصفية الحسابات.
ح نجيب تار المريخ وتار صن داونز.
قررنا نفعل ذلك.
ح نجيب التار.
السنة الفاتت أثناء إجراء القرعة شفت ليك مريخابي يتلبد حائم.. قلت ليه إنت بتتحاوم بي جاي عندك شنو؟
قال لي عاوز أشوف القرعة.
قلت ليه وإنت يا أبو رويس متل رأس السنة الكبيسة.. القرعة عندك فيها شنو؟
قال لي عاوز أشوف الأهلي المصري بقع في ياتو مجموعة.
قلت ليه وإنت مالك ومال الأهلي؟
قال لي أصلو الأهلي مرة دفع لينا حق الإقامة ونثريات المعيشة.
السنة دي المريخ القرعة ما عندهم فيها أي شيء .. لا أهلي ولا صن دوانز.
ما عندهم حاجة فيها تفش غبينتهم.
المريخاب ما يستعجلوا على رزقهم.. قولوا ليهم انتظروا قرعة التمهيدي بعد عشرة شهور.. 300 يوم في لمحة بصر بتمر وترجعوا تاني تطلعوا من التمهيدي وتطلِّعوا بيان توعدوا فيه جماهير المريخ بتصحيح الأوضاع.
الدخيري خرب طبع المريخ.
عاوزين يخشوا بالمكتب..!
