مرّة مشيت مع واحد صاحبي على مطعم، طلبنا لينا فرخة مشوية، أول ما جابوا لينا الفرخة المشوية مدّيت إيدي عشان أقطع من الفرخة، صاحبي ثبتني قال لي تعرف (الجدادة) دي حيّـة، رجّعت إيدي، وقلت ليه عرفتها كيف؟ قال لي جناحها قاعد يتحرّك… للأمانة قال لي (بفرفر)، لكن أنا صلحتها ليكم وقلت (بتحرك).. يفرفر نحن في حلة!!
قلت ليه يتحرّك كيف وهي جابوها لينا مشوية من نار الفحم قِـدّامنا؟، قال لي أثبت ليك؟ قلت ليه أثبت.
زولكم ضرب ليك الفرخة ما خلّى فيها حاجة وأنا قاعد أعاين، أول ما فضل منها (جناح)، مَـدّ لي الجناح، قال لي أضربهُ، الجناح دا يا دوب مات. أكلت الجناح هو مشى على المغسلة، وأنا مرقت طوالي، أغسِّل على شنو؟ قبل ما أطلع من المطعم، ثبّتـني وأشار بأصبعه على (الكاشير)، المعنى أدفع الحساب.
عموما أول مرة أشوف حالة (جغم) قدامي.
الموضوع دا ذكّرني زول كان قاعد بجواري في الاستاد، ونحن بنحضر في مباراة هلال مريخ، الزول دا قبل ما تبدأ المباراة نام، فجأة صحى، قال لي الكورة كم؟
قلت ليه 3 / 0 بهجة وطمبل والبرنس، زولكم رجع نام تاني، وقبل ما يشخِّر قال لي لمن يجيبوا الخامس صحِّـيني.
زولكم لغاية الآن نائم.
