رأيت فيما يرى النائم إني أسير في طريق (مكفهر)، مكفهر دي في الحلم ما عارف جاتني من وين؟
وكديسة في نهاية الشارع ـ وصوت نباح لكلاب يبدو أنها سعـرانة.
وبينما وأنا أسير في ذلك الطريق وجدت (فانوساً)، مسحت على الفانوس طلع لي منه مارد أزرق طويل، وقال ليّ شبيك لبيك أنا المارد الأزرق بين إيديك، أطلب ما تريد.
قلت ليه: تصلح لينا كوبري شمبات.
المارد قال لي ما في مشكلة، اعتبر الموضوع انتهى.
قلت ليه: واستاد الهلال.
المارد قعد يحك في رأسه ـ ثم قال لي ما في مشكلة.. ما بيناتنا استاد الهلال.
قلت ليه: والحرب.
قال لي: اعتبرها انتهت.. والسودان رجع أفضل مما كان.
قلت ليه: كرشوم.
قال لي انتظر الإعلان الرسمي على الصفحة الرسمية لنادي الهلال ـ كرشوم في أعظم نادٍ.
قلت ليه: والمريخ!!
قال لي حرام عليكم، إنتوا عاوزين تعملوا في المريخ أكتر من كدا شنو؟ خلوا عندكم رحمة شوية.
قلت ليه: والمهاجم السوبر!!
من جبت ليه سيرة المهاجم السوبر، المارد اختفى، وشعرت ليك أنه تبخر (دخان)، وسمعت صوت جاني من بعيد طالع من الدخان وهو يقول لي: إنت كمان ما تبالغ.. دي العليقي ما قدر عليها، أقدر عليها أنا.
