قلت الموضوع دا عاوز الذكاء الاصطناعي ــ سأللت عن اسم مازن، جاتني الإجابة (اسم “مازن” هو اسم علم مذكر عربي الأصل، يحمل عدة معانٍ، أبرزها: السحاب الماطر، والمضيء الوجه، والشخص الذي يمضي لوجهه ويطلب الحاجة، وبيض النمل. كما قد يعني أيضًا المادح أو المثني).
وقفت ليك في (السحاب الماطر)، قلت أمك نقطت في دار السلام.. هو ناس المريخ يقدوها في الدامر تنقط ليهم في دار السلام!!
يا العليقي خلي مجلس المريخ يستلم ـ عشان الهروب يكون مؤسس.
مشيت فتحت التلاجة، عندي حلة عدس ليها أربعة أيّام ما قادر أمشي عليها ـ لمن سمعت خبر مازن فضل نزلت ليك في العدس بي نفس، ولا أحلى سمك.
فتحت الماسورة كبت لبن حليب، وهي ليها سنتين قاطعة.
فتحت المروحة اشتغل المكيف بدون كهربة.
قلت أكتب لي قصيدة في المناسبة الرومانسية دي..
قبال أقول.. ردت عليّ
قلت البلد دي الليلة الحاصل فيها شنو؟ الزولة دي السلام ما بترده، الليلة مالها، الخفة شنو؟
عندي جلابية وعمة طلعتها ووضعتها في السرير، وقلت في باقي الليل دا لو جابوا لي خبر محمد المصطفى ـ الجماعة ديل بنعقد ليهم.
عضو في مجلس المريخ، قال الظاهر علينا نحن اتمقلبنا، إنتوا مالكم عاوزين تطيِّروا لينا (الجاز) من رأسنا.
