ناس المريخ ديل بدأوا من فوق شديد، أول حاجة قالوا عاوزين يلعبوا في (دوري أبطال أفريقيا).. وقالوا ح يتأهّلوا من غير ما يلعبوا.
شطحوا شديد.
قُـلنا جميل ما في مشكلة.. خير وبركة.
طلعوا من التمهيدي قبل ما تفتح سمح، قالوا ح يلعبوا في (الدوري الليبي).. طلع كلام ساكت!
وقبل الكلام دا كانوا قالوا ح يلعبوا في (الدوري المصري) ـ صدّقوا روحهم وأكدوا أنّ علاقتهم مع الأهلي المصري تسمح بذلك.
وبرضو طلع مجرد كلام.
دا كله كان كلام ساكت.
قالوا ح يلعبوا في (دوري جنوب السودان).. الحالة واحدة، وما في جنوب بدون شمال وما في شمال بدون جنوب.
قلنا خيراً ما تعملوه.
وما في حاجة في هذا الاتّجاه حصلت.
تتخيّلوا هسع لقيناهم قاعدين يلعبوا وين؟
طلعوا بيلعبوا في (دوري المرحوم ونيس).
هي حصّلت!
المشكلة في دوري المرحوم بتغلبوا.
الشافكم في دورة رمضانية ما كضّب!
جابوا ليهم مجلس (نفطي) جديد، وجهاز فني بقيادة الصربي داركو، وثلاثة مديري كرة و16 محترفاً أجنبياً، وزي جديد ولون (كريمي)، غير ناس أمير كمال والسماني الصاوي وعمر تنقا ومحسن سيد ومحمد حلفا ،عشان يلعبوا في دوري المرحوم ونيس؟
فضيحة السواد.
أنا سمعت بمسلسل محمد صبحي (يوميات ونيس)، لكن دوري المرحوم ونيس للأمانة أول مرة أسمع بيه عند المريخاب.
أنتوا الحاجات دي بتجيبوها من وين؟
بطل الكأسات المحمولة جوّاً، أكبر من هذا الكلام.
غايتو إلا يكون عندهم فهم، وعاوزين يعملوا تمويه، عشان فجأة يظهروا في الدامر.
احتمال نحن فاهمين غلط.. واحتمال دوري المرحوم ونيس بيأهل الى كأس العالم طوالي.
غايتو (الجاز) الجابوه ليكم دا يا ناس المريخ فيه حاجة ما طبيعية.
أصلو ما طبيعي!!!
عندنا (كديسة) كانت كل ما تشرب اللبن بتصرّف تصرفات غريبة ـ الفأر يجي ويفوت قدامها ما بتعمل ليه حاجة.
وقت الموضوع اتكرّر عملنا فحوصات للبن، فوجدنا أن اللبن الذي كانت تشربه فيه نسبة من البنزوديازيبينات أو الباربيتورات وهي مواد مُهدئة، عشان كدا الفئران لقت راحتها.
أنا شاكِّي في (حِنّـة الدامر)، الناس ديل من قوون روفا الرابع ما طبيعيين.
أو احتمال (جازهم) دا فيه شئ ما طبيعي.
