عندكم وقت أقلِّب معاكم البوم صور الذكريات.. زمن كانت الصور (أبيض وأسود)، والعريس في الصورة بكون شايل ليه زهرة، والفيلم عاوز ليه (15) يوماً عشان يحمِّضوه، ومرات كمان بقولوا ليك الفيلم حرق!!
المريخ آخر مرة وصل المجموعات.
أيام الصور (أبيض وأسود)، أيام أمير كمال مبرم شعرهُ، وبقولوا ليه أمير العُشرة، كان لاعب جديد يا دوب منتقل من الموردة قبل أن تهبط.. وهيثم مصطفى كان بفك معاها (صينية باسطة).
أنا ما عارف الجاز دا جبتوه من وين؟
تتذكّروا قبل مواجهة الهلال للمريخ في دوري النخبة في الدامر ـ قبل الأربعة ناس المريخ قالوا شنو؟
قالوا عاوزين يحولوا الهلال للعب في الكونفدرالية.
تحوِّلوا الهلال للكونفدرالية وإنتوا مدير كورتكم ما قادرين تحوِّلوه من نواكشوط إلى بورتسودان بعد أن احتجزوه كرهينة في فندق الإعاشة.
إنتوا بتنسوا؟
أنا ما عارف الجاز دا جبتوه من وين؟
روفا قالوا ليه الكلام دا ـ قال ليهم جيبوا لي ملف الجمل وابعدوا بعيد، عشان نشوف موضوع الكونفدرالية دا شنو؟
أول زول أطاح بيهو روفا قبل الجمل وشوقي غريب، النمير ومجلسه.
كابو ذنبو شنو؟
كابو ما عمل حاجة غير أنه سحب المريخ، أمام الهلال، ليس مرة واحدة، بل مرتين.
هسع ناس المريخ الكونفدرالية ما لموا فيها ـ طلعوا من التمهيدي للبيت عِـدِل.
أتا ما عارف الجاز دا جبتوه من وين؟
إنتوا عارفين باقي لي رمضان كم يوم؟
باقي ليه 127 يوماً.
عارفين باقي لي عيد الفطر المبارك كم يوم؟
باقي لعيد الفطر المبارك 157 يوماً.
عارفين باقي لعيد الأضحية كم يوم؟
باقي لعيد الأضحية 225 يوماً.
عارفين باقي للمريخ كم يوم للمشاركة في البطولة الأفريقية في الموسم القادم؟
عيييك .. الآلة الحاسبة ضربت ـ قالت لي إنت كمان ما تبالغ.. وبدأت الآلة الحاسبة تطلع ليّ (فقاعات)!! وعلامات تعجب وإستفهام ما مفهومة وعنكبوت وود أبرق!!!؟؟
العنكبوت مفهوم ود أبرق كمان في شنو؟
يا حليل زمن جوز الحمام فيه تلاتة، والأسبوع فيه جمعة واحدة، واتنين في تلاتة بي ستة، وترباس في دار فلاح والسهرة عالم السينما وآخر محطة المواصلات ما بتصلها.
وقِدرة الفول للساعة واحدة بي فولها، زمان كان تلف السوق العربي دا كله بما في ذلك عمارة الدهب عشان تفك ليك عشرة جنيهات وما بتلقى فكة، أيام المريخ كان ما بطلع من التمهيدي.. وفانيلة السقط بنلبسها في الصيف.
غايتو نحن من قمنا لقيناه بطلع من التمهيدي ـ ما عارف الوضع كان كيف أيام عوض بابكر في بداية تقديمه لبرنامج (حقيبة الفن)؟.. والبروفيسور عبد الله الطيب و(حقيبة الذكريات).
الدنيا كانت حلوة (الدو) كان خمسين وشاي اللبن كان بتشربهُ (دبل) والحصة الأخيرة (دك).
ما كان فينا واحد بقفِّل الإملاء.
ولا فينا واحد حافظ جدول (٩)… ولا كان في (دعم سريع)، ولا عدس الأسبوع كله.
أنا ما عارف الجاز دا جبتوه من وين؟
جازكم دا أصلو ما طبيعي ـ ريحتهُ تمهيدي تمهيدي!!
