قمت الصباح، تميت باقي (الشاي) و(المغايي) في الشارع، لقيت جاري فاتح الكبوت بتاع عربيته وما عارف يعمل شنو؟
قلت ليه انت (الهكر) دي لسه ما غيرتها، يا ريت ناس الدعم السريع لو شفشفوها منك وريحونا منها ـ جاري قال لي عشان تعرف فائدة (الهكر)، عربيتي لو ما هكر كان اتشفشفت.
يا زول الهكرة دي بركة، الشفشافة وقفوا في رأسها دا زي وقفتي دي تسع مرات.. أنا عاملها هكر بي فهم.
وقفت معاه في كبوت العربية وقلت ليه الحاصل شنو؟ قال لي والله العربية دي حيرتني عديل كدا، غيرت ليها أي حاجة سير الماكينة، البلي، الفحمة، البلكات، الكربريتر، ما خليت ليها حاجة ـ عملت ليها عمرة كاملة وما عاوزة تدور.
حاولت أشعرو اني فاهم قلت ليه البطارية كيف؟ قفلني طوالي.. قال لي البطارية جديدة، جبتها أمس.
في أثناء كلامنا مروا علينا شباب، قلنا ليهم ايديكم يا شباب، وقعدنا ندفر.
قدر ما لزينا ما في حاجة، البقول ليه انقر سريع والبقول ليه ارمي ليها اتنين، والبقول ليه خليها تمشي شوية، والبقول ليه امرق من الدقداق دا.
الشباب الجبناهم يدفروا معانا اتفرغوا للتنظير، يبدو ان بينهم كان هنالك خبير استراتيجي وخبير عسكري وخبير اقتصادي وخبير في الإعلام.
اصلو الناس البلد دي بقوا كلهم (خبراء).. عشان كدا السمك طار السماء.
السمك علاقتهُ شنو بالموضوع؟
فجأة كدا شميت لي ريحة، ونحن بنلز في الهكر، قربت من التانك واستنشقت بقوة.
استنشاق (خبراء)، شميت لي ريحة (تمهيدي) قاطع، مرات يبدو لي تمهيدي اول، ومرات يتهيأ لي تمهيدي تاني، (مرات أشوف بعدك حقيقة ومرات ألاقيهو هظار هظار).
قلت ليه انت الجاز دا كبيتو من وين؟ اوعك يكون من طرمبة ناس التمهيدي الأول؟
قال لي في شنو؟
قلت ليه الجاز دا ما نضيف!! لكن بحلها ليك، كدا اركب أول ما ندفرك اديها (اربعة).
أربعة طوالي، صاحبكم ركب واداها أربعة، العربية دورت زي الطلقة، قبل ما يبعد صاحبكم طلع رأسو بالشباك وقال لي عملت ليها شنو يا شقي؟
قلت ليه انا ما عملت حاجة، روفا عمل كل شئ.. ومشيت البيت على كدا، مبسوط وفرحان وشاعر اني عملت حاجة مفيدة.
