استوقفني أحد الهلالاب الجميلين في إحدى صفحات الهلال عندما وجد رقم بطاقة عضوية لاعب الهلال عبد الرؤوف يعقوب 3244 فعلق بقوله (نحن أي حاجة عندنا بي نظام) وذلك لوجود الرقم (4) في رقم بطاقة روفا ـ السيستم قاصدها، خاصةً أنه أكد الـ(4) أو كرّرها مرتين، ومعروفٌ أنّ روفا اختصاصي جراحة (الأربعات) وخبير حميات (الأربعة).
بكالوريوس (أربعة) وعقاب شهر.. دراسات عليا في جدول (أربعة)، ودكتوراة في الرقم (أربعة) ومعكوساته، وليس مضاعفاته، زميل الكلية (المربعة).
معقولة جات صدفة؟ ولو صدفت في أربعة، كيف لها أن تصدف في الأربعة التانية والأربعة مكررة (حسابياً) في رقم بطاقة روفا ومؤكدة (لغوياً)، وجمع الأربعتين بعمل تمانية وهو رقم فانلة روفا.
يعني يا بتوع التمهيدي الأربعة ما فايتاكم.. روفا وضعكم في رأسه.
نحن أي حاجة عندنا بي نظام.
وازعم أننا لو فحصنا فصيلة دم روفا سوف نجدها (رو4) أو (روفور).. في واحد قال لي إنت ما تقول (اي فور) وتختصر الموضوع.
بنقول ليكم (نحن أي حاجة عندنا بي نظام) ما بتقبلوا، أو تقعدوا تغالطوا، أكتر من كدا نعمل ليكم شنو؟ زول سحب بطاقته طلع رقمها فيه أربعتين.
وعشان الأشياء عندها علاقات ببعضها البعض رقم بطاقة العليقي (4)، الأكيد أنّ العليقي لم يقصدها ـ لكن المريخاب، عندهم اعتقاد راسخ إنو الزول دا شايلها معاهم.. وإنو قاصدهم عديل.
موقف التمهيداب من (الرباعية) قالوا يتمثل في أن رفضهم القاطع لها في كونها (رباعية).
إشمعنا رباعية!! ، يا يشيلوا الإمارات من الرباعية وتبقى الثلاثية أو يضيفوا دولة أخرى للرباعية وتبقى الخماسية ـ لكن رباعية بوضعها الحالي (بل بس)!!
أقول ليكم حاجة تزعِّـل، داركو للطيران دا فيه حلاة (أربعة)، منها والإقلاع.
أمانة فيكم الصربي دا أرجوا بيه (رو4) في كيجالي عشان يأخذ أربعته ويطير.
لكن الزول الشفقان دا، أبوعيون صربية ما أظن ينتطرنا، بيطير قبل القمة، وفي النهاية الموضوع بيرسى على محسن سيد.
أو (أي دمعة حزن لا لا)، المريخاب من تركوا هذا الشعار وقالوا قاعدين يبنوا ما قامت ليهم قائمة تاني.
في زول بضع حجر الأساس (قصب وقش)، وهو عاوز يبني ليه عمارة.
وابني عُشك يا قماري قشة قشة..
وطيري يا قمرية ـ أهو كله طيران.
