لمن نقول ليكم (نحن أي حاجة عندنا بي نظام)، ما قاعدين تصدِّقوا.
بتزعلوا وتعملوها لينا كلها غلاط، وطنطنة من تحت اللسان، وصرصرة عيون، ومَــــــد بُـــــوز.
نحن قاصدنها
عملناها كدا مخصوص.
القاصر فلمو إيمانويل سوف يكمل غداً إن شاء الله (18) سنة.
وغداً 31 أكتوبر هو اليوم الأخير في فترة التسجيلات الصيفية.
الشغل دا صدفة؟ ـ أم جينات وعادات وتقاليد وهندسة وراثية؟
غايتو أنا عن نفسي (هندسة وراثية) دي أول مرة أسمع بيها ـ ما بتلقوها في حتة. تانية.
ناس الهلال ظبطوها كدا كيف؟
كيف يصادف آخر يوم في التسجيلات، عيد ميلاد فلمو الذي يكمل فيه (18) سنة.
الزول دا مبروك، كأنه مولود عشان يتسجل في الهلال في عيد ميلاده.
ناس العليقي عملوها كيف؟ عسان تظبط معاهم كدا.
جات طق طرق.
الموضوع دا زي في الكوتشينة، أول ما تقفل على كرت بالاسم بفكوه ليك.
لأول مرة التسجيلات تستمر أكثر من ثلاثة شهور، عشان فلمو يكمل 18 سنة في آخر يوم في التسجيلات.
يكون أسامة عطا المنان؟ ـ البكاء ح يدور في العرضة جنوب.
بيت البكاء قالوا عندهُ فرع في بنغازي وفرع في كيجالي وفرع في بربر.
في بربر عملوا ليهم فرع.
وناس بربر بسخنوا البكاء.
فرع بربر دا خايف يكون للدهب ما للكورة ، المشاركة في دوري بربر تكون تمويه.
هي وينها الكورة البتعلبوا بيها في كيجالي وبربر وإنتوا بتطلعوا من التمهيدي الأول.
الهلال رجل صالح.. بتمشي معانا باسطة.. المدهش أن قيد فلمو في هذا الوقت سوف يسمح له باللعب في الدوري الرواندي.
الاتحاد الرواندي فيه برضو أسامة عطا المنان؟ قلنا ليكم الشئ صلاح ساكت.
قعدتوا تغالطوا.
أثبت ليكم.
إيمانويل فلمو سوف تتم إضافته لكشف الهلال الأفريقي ليشارك في مرحلة المجموعات.
الاتحاد السوداني خلوه..
الاتحاد الرواندي خلوه..
الاتحاد الأفريقي هل فيه أسامة عطا المنان آخر؟
فلمو سوف يشارك مع الهلال في كل البطولات.
هو الزول دا قبل ما يتسجل شارك مع الهلال في سيكافا.
وسجل هدف كمان.. حالتو دي بدون تسجيل!!
في صلاح أكتر من كدا.
الهلال رجل صالح.
تتخيّلوا المريخ فيه (13) محترفاً أجنبياً، ما ح يلعبوا في البطولة الأفريقية، قاعدين تمومة معسكر والقاصر فلمو سوف يلعب في البطولة الأفريقية.
زول اتسجل في الهلال يوم 31 أكتوبر بعد أن أكمل 18 سنة وبعد أن خرج المريخ من التمهيدي، وسوف يلعب في دوري أبطال أفريقيا.
كلامكم شنو يا ناس المريخ؟
ما قلتوا قاصر.
القاصر سوف يكون متاحاً فقط في قنوات بي ان سبورت ـ فقط في مرحلة المجموعات (دا قصور السرور)، أمشوا جددوا الاشتراك، عشان بعدين ما تقعدوا تغالطوا فينا وإنتوا الكورة ما شفتوها.
بكرة إن شاء الله عيد ميلاد فلمو إيمانويل، الذي سوف يكمل فيه (18) سنة وسوف ينضم في نفس اليوم رسمياً لكشوفات الهلال.
بكرة في كيجالي سوف يحتفلون بعيد ميلاد القيصر، وح يجيبوا التورتة وينزلوا الصور في الصفحة الرسمية للهلال.
قاصدنها ـ عشان الناس كلها تعرف الزول دا عمل 18 سنة.
نحن أي حاجة عندنا بي نظام.
القاصر ـ خلاص كبرت وليك 18 سنة، عمر الزهور، عمر الغرام وعمر الانضمام للهلال.
واضح فلمو مغرمٌ بالهلال.
بالروسي يعني فرحان بالهلال.
اتجاه في المريخ للاستغناء عن أمير كمال بعد انضمام فلمو للهلال.
الله يستر على مجاهد سهل.
السماني الصاوي عرفها.
الصاوي مرق منها ـ البمرق طبنجة منو؟
نحن الأربعة تاني ما بنقيف فيها.
من سبعة وماشي لي فوق.
مريخابي قال لي نحن ما عندنا مشكلة (داركو للطيران)، بيلعب بأسلوب دفاعي ومن حيث شغال على (الخندقة).
قلت ليه (الخندقة) ما بتفككم، الزول دا إلا يلعب بطريقة (زيكو)، كلِّموا هيثم كابو يشوف رامي كمال وين؟
الشغل دا صعب عليكم.
#أنقذوا_الفاشر
