نادي الهلال بلخص الوضع المعقد العايشنو في السودان وبره السودان زي ماقال الكتاب.
قبل فترة طلع قرار ضد شركات وقود واتوجهت ليها اتهامات خطيرة جداً بالتلاعب وغسيل الأموال وتهم أخطر والشركات دي فيها شركات تابعة لي ناس في إدارة الهلال.
قبل فترة كنت أشرت للصرف الماطبيعي البتصرف على النادي والفريق وقلت ده بخلي شكوك حول مصادر الأموال ممكن تمشي في إتجاه غسيل الأموال وطبعاً كالعادة اتهاجمت من العوقات.
المهم كيف كيف قرار حظر شركات الوقود اتفك تاني يوم وطبعاً في دولة الفساد عادي وبتحصل.
قبل ده اتفتح ملف الميزانية اللي كشف بلاوي متلتلة نسفت الميزانية وانقلب السحر على الساحر.
تبقى المجلس في القفص ومواجه باتهامات خطيرة بعد ما اتحركت القضية وبقت واقع.
الكلام كتير وممكن مع ظروف الجوع الفي البلد نناقشو باستفاضة لأنه حتى الجوع والوضع ظهر في الفريق المقسوم علي اتنين في فضيحة إدارية بطلها اتحاد الكورة اللي احتقر بطولته الأولى الدوري وسمح لنفوذ تجار الوقود في الهلال ومعاه المريخ يفرضو المشاركة بفريقين واحد سياحي مشارك في رواندا في بطولة شرفية ودوري أضعف مايكون مافيه أي إضافة للفريق ومجرب.
وفريق جعان بلعب في دوري الجوع سموهو الرديف، الغريب في المعادلة الأغرب دي أنه فريق الجوع الرديف لاعب لصالح الفريق السياحي القاعد في رواندا شايل ليهو الشيلة ولازم يحقق يا البطولة يا المركز التاني في دوري الجوع الرديف، من أجل عيون الفريق السياحي الفي رواندا عشان يشارك في البطولة الأفريقية، لأنه مشاركة الدوري الرواندي بتوديك الفندق النازل فيهو بس ما أي حتة تانية.
قادر تتخيل الوضع.. ودي ما أول مرة الفريق السياحي بمثل أفريقياً على اكتاف فريق الجوع.
الكلام كتير نرجع ليهو تاني.