أنا متأكد بعد شوية ناس المريخ ديل ح يطرحوا فكرة تصميم أطقم المريخ في الموسم الجديد للجمهور ـ ربما فقط يمنعهم الخجل.
رديف الهلال وصل رواندا، والصور نزلت على موقع الهلال، بعد أسبوع أعلن المريخ عن سفر الفوج الأول من بعثة رديف المريخ إلى رواندا.
طيب ما كان من الأول؟
سافر عمار مرق… قالوا الفوج الأول للمريخ سوف يسافر بقيادة عمر تنقا.
عمر تنقا ذاتو شال اللقب من الهلال.
الهلال توقف عند ذكرى الإبادة الجماعية في رواندا في يوم الذكرى، جماعتنا ديل بعد أسبوع نزلوا تصريح لمدربهم يتحدث فيه عن ذكرى الإبادة الجماعية في رواندا (ما عاوزين يعملوها ظاهرة)… جابوها موزة بـ(داركو للطيران).
الناس ديل زيهم الرسمي اتنكروا ليه.. بقوا يقولوا ليك الكريمي يتعادل مع الأحمر.
كريمي شنو؟ انتوا بتلعبوا تنس؟
شوف عيني المريخ بقى يلبس اللون الأزرق في معسكر رواندا.
الناس ديل ماشيين على درب هلال الأبيض، الابن الأكبر للهلال.
قريبي هلالابي صعب عندو جارو مريخابي في الحلة معذبو عذاب… قريبي يغير باب الحوش، المريخابي يغير باب الحوش، قريبي الهلالابي يغير العربية، المريخابي اليوم التاني يغير عربيتو.
يغير الموبايل ..المريخابي يغير موبايله.
قريبي قال لي: والله أنا خايف لو طقتني كهربا، زولكم دا (وهو يشير إلى المريخابي) ألقاهو قدامي في قسم الحوادث يشكي من صعقة كهرباء.
ثم ضحك وقال: المشكلة ألقاهو قبلي في أحمد شرفي… الزول دا يمكن يزيد المحليية.
يا ضلنا بقيتوا تعملوها واضحة.
