خوليسو موداو (صاحب الصورة) مدافع صن داونز، كنتُ إلى وقت قريب فاكر إنّ صلعته دي كلها علم وكورة وعكسيات متقنة، بعد الذي فعله فيه جان كلود اتضح لي إني كنتُ مخدوعًا فيه ومخدوعًا في صلعته.
صلعته طلعت كلها كروت صفراء وجدعات تماس وشلهتة وبهدلة وتزحلق على النجيلة.
طبنجة عنده فكرة يدخل مباراة القمة القادمة يوم 6 يونيو بصلعة، قال يمكن يقدر يعمل حاجة بالصلعة.
يا طبنجة لو الصلعة بتعمل شيء كانت عملت صلعة خوليسو موداو.
الواحد عنده صلعة طول وعرض، وبيلعب باك، طيب خليتوا للدكاترة شنو؟
زمنا كان ما في زول بيعمل ليه صلعة في الفاضي.. يعني ما منطقي يكون عندك صلعة، ولابس برمودا، وشايل صحن البوش بتفتش ليك في صندوق بيبسي عشان تقعد فيه.
زمنا الجلحات ساكت بتعادل ماجستير… هسة بالسوى والما بسوى عمل ليه جلحات.
الواحد قبل ما يعمل ليه ركشة بيعمل ليه صلعة.. وكان للجلحات، بقوا يدخلوا بيها امتحانات مرحلة الأساس، متل (البخرة).
