كنت فاكر بعد هدف ياسر مويس في المريخ ما في فضيحة أكتر من كدا (ينتهي العزاء بانتهاء مراسم الدفن)، لكن وقت شفت هدف غوريلا الثالث، قلت الكاردينال لو شاف الهدف دا، أبوجا من المريخ بيشطبه (حتى لو ما عنده علاقة بالموضوع).
أنا أول مرة أشوف لي هدف أطول من السنة الكبيسة.. الهدف من (كيغالي) اتسجل في (أبوجا).
الفيفا أو المحكمة الرياضية لو شافت الهدف دا بتسحب الرخص من المريخ، الناس ديل مفروض يشوفوا ليهم شغلة تانية غير كرة القدم.
هدف في الدورات المدرسية أو الدورات الرمضانية ما بيحصل.
لكن مع فضيحة هذا الهدف، أنا شايف الفضيحة الحقيقية في بيان مجلس المريخ رداً على بيان نادي الهلال الذي انتقد فيه الحكام وطالب بالعدالة.. مجلس المريخ اتضح أنه كله (أبوجا).. أبوجا ما براهو.
اعتبر مجلس المريخ أن بيان الهلال فيه ضغوط وتأثير على المباريات القادمة.. مع أن أم مغد (سنة أولى ممتاز) أصدرت بياناً (قدر الليلة وباكر) تهاجم فيه الحكام بإيعاز من المريخ.
يعني أم مغد عادي جداً تصدر بياناً وتهاجم التحكيم وتتهم حكم مباراتها أمام الهلال تحديداً (استجابة لرغبة المريخ)، والهلال النادي الريادي وبطل المنافسة ليس له الحق في الاعتراض على الحكام.
دا فهم شنو دا؟
والأهلي مدني عادي يصدر بياناً يعترض فيه على ملاعب المباراة، ثم يصدر بياناً آخر يعترض فيه على عدم بث مبارياته على منصة الاتحاد، هذا عادي في فهم المريخ.
المريخ من حقه يطعن في ستة أندية، والهلال ليس من حقه أن يطعن في الحكام.
والمريخ يصدر بياناً يحذر فيه ويهدد الحكام، وقبل ذلك يصدر بياناً عن عدم تلفزة المباريات، كل هذا عادي في المريخ، أما الهلال فلا، وهو أكثر المتضررين.
والله دي أبوجا ذاتو ما يعملها.
انتوا الناس ديل بتجيبوهم من وين؟
الصنف دا يتخيل لي إتعدم.
في ناس جوا الدنيا دي بس عشان يغالطوا.
الواحد فيهم لو ما غالط ما برتاح.
على العموم السبت ما بعيد.. حسابكم تقل معانا.
روفا قالوا قعد مع ناس الموية ـ ما عارف فهمو شنو؟
أكيد عندو رأي.
لكن ناس الموية علاقتهم شنو؟.. الله وأعلم.
الموضوع دا نحن بنشوف ليه حل.
أبقوا رقاق.
مقالات ذات صلة
