أيام الدراسة كان من المعتاد في أي مدرسة أن تلقى ليك طالبًا أو اثنين أو ثلاثة مجتهدين اجتهادًا شديدًا، السنة كلها بذاكروا، لا بتلقاهم في حفلة ولا بتشوفهم في كورة، وقتهم كله بقضوه في القراية.. في المذاكرة تلقاهم أول الحاضرين وآخر من يمرق من الفصل، في درس العصر تلقاهم قاعدين قدام، في الحصة الصباحية تلقاهم متشمرين بكل جد وهمة.
الأستاذ وقت يسأل سؤال، تلقاهم أول من يرفع إيدو عشان يجاوب، في الاختبارات الشهرية بجيبوا درجات كويسة وبقفلوا الاختبار.. في طابور الصباح لازم في كل يوم يقدموا ليهم فقرة في البرنامج.
الرسوم الدراسية أول الدافعين، في الحفظ ما في زول بيلحقهم… حافظين صم.
التزام بالزي المدرسي، والحقيبة المدرسية الجميلة، حتى المذكرات أي مذكرة تطلع تلقاها عندهم، والقميص دائمًا مكوي مكوة موس.. لا عندهم مشكلة في قلم لا في مسطرة.
حتى فطورهم يكون دون كل الطلبة فراخ وحمام ولحمة، أقل شيء بتلقاهم حاشين سندوتشاتهم سجك.
أي كورس بيدخلوا فيه، يعني أصلًا ما في حاجة ناقصاهم.
أول ما يوزعوا النتائج جماعتنا ديل بظهروا على حقيقتهم… بذيعوا العشرة الأوائل ما بتسمع أسماءهم، العشرة الثواني ما بتسمع أسماءهم، العشرة الثوالث ما بتسمع أسماءهم.
قرايتهم بتطلع (كلام جرائد) أو كلام فيسبوك ساكت، على تعبير ولاد هذا الزمن.
ناس المريخ ديل حيرونا… أول من يدخل معسكر.. الجماعة من معسكر لي معسكر.. من دولة لي دولة.
تسجيلات تقول القبة تحتها (ميسي).
وفريق أساسي وفريق رديف.
شغلكم دا جنسية واحدة كتيرة فيه، تأشيرة دخول ساكت كتيرة عليكم.
فريق يشارك في دوري الدرجة الأولى في بربر، وفريق في الدوري الرواندي، وفريق في الدوري السوداني.
والنتيجة: لم ينجح أحد.
مدرب صربي، ومدرب سوداني، ومدير رياضي مغربي، وخبير ملاعب من الاتحاد الأفريقي.
ولجنة تفوت ولجنة تجي.
وفي النهاية يا هو دا حالهم، أول من يخرج من مرحلة التمهيدي في البطولة الأفريقية.
في الدوري الموريتاني جاءوا في المركز السادس بفارق 24 نقطة من الهلال.
في الدوري السوداني تسمع عن صدارتهم وفي النهاية يأخذوا أربعة.
في الدوري الرواندي انظر إلى الجدول، الفارق بين الهلال والمريخ 16 نقطة.. طبعًا الدوري الموريتاني والرواندي لا فيه أهلي مدني ولا فيه الفلاح ولا فيه أم مغد ولا محمد حلفا.. عشان كدا يظهروا على حقيقتهم.
عشان تعرفوا المفارقة، (أسد) سجل ثلاثة أهداف في الفلاح في 12 دقيقة، و(غوريلا) هزمت المريخ ذهابًا وإيابًا، أو زي ما قال علي عصام غوريلا تهزم أساسي المريخ ورديفه (يعني ما عندكم أي عذر).
أسد على الفلاح وفي الدوري الرواندي غوريلا!!
غوريلا بهدلت المريخ ، أبوجا طلع (أكرم) من أكرم الهادي سليم أمام الوحدات الأردني.
غايتو البسمع كلامكم في بداية الموسم بقول السنة دي الله يستر على باريس سان جيرمان.
الهلال مشى دار السلام جاب الدوري السوداني، مشى موريتانيا جاب الدوري الموريتاني، مشى رواندا جاب الدوري الرواندي، وكل ذلك حدث في سنوات هذه الحرب.
انتوا بتمشوا بتعملوا شنو؟
خسارة (جاز) ساكت.
مقالات ذات صلة
