إعلام المريخ سنة كاملة بكتب عن أن ايمانويل فلمو (قاصر).
قول (قاصر)، كيف يعمل فيكم كدا؟
انتوا الكبار وعاقلين كنتوا وين؟
المساكين، ركزوا في (السوبر)، وما عارفين أن المشكلة كلها في (القاصر).
قالوا فلمو متسلل.. متسلل أم قاصر؟ ابقوا على حاجة واحدة.
مشكلتكم شنو انتوا مع القيصر؟
الحاجة الما وقعت لي لغاية الآن، هو أن القاصر (مصاب)، بعد أن تعرض لحادث حركة عديل في مباراة الهلال السابقة أمام هلال الفاشر.
شوف عيني دي.. فلمو شالوه بالنقالة، طلع بعربية الإسعاف من الملعب إلى المستشفى.
السودان كله كان شاهد على هذا المنظر.
نحن قنعنا من فلمو.. والمريخاب بالهم راق، وأي زول قال فلمو لن يكون ضمن قائمة مباراة القمة.
ناس الهلال ديل شفوت… حيرونا عديل.
القيصر شارك أمام المريخ عادي، وجاب ليه قون كمان.
مصعب مكين قالوا ليه: يا زول أنت مالك الزول دا سرحت منو؟
قال ليهم: انتوا ما قلتوا مصاب!!
صديقي المريخابي المهندس هيثم السنوسي قال لي: نحن فهمنا الموضوع غلط.. (إصابة) فلمو طلعت في شبكة المريخ وليس في (ساقه).
ناس الهلال الشفوت قالوا ليك: إصابة فلمو خطيرة!!
إصابة فلمو في القلب.
زول طالع من الملعب في آخر مباراة بعربية إسعاف ..يجيب فيكم قون بالشكل دا.
بعد دا يطلع ليك واحد ويقول ليك: محمد أسد هداف الدوري.
مقالات ذات صلة
