“طبخة الكبري”

كتبت قبل مباراة الهلال والمريخ في فاصلة دوري النخبة،.. المريخ حيفوز ببطولة النخبة بكبري زي كبري كيجالي في الدوري الرواندي الاتغلب فيهو الهلال.

ده في إطار تقاطعات مصالح ( شل شل كب لي جالون) اللي أفسدت التنافس الرياضي بتواطوء من اتحاد الكورة لتمرير مصالح الشبكة.

واضح إنه ( الكبري) جاء من المكتب، الحصل اتمرر فوز الهلال في الملعب وتم التتويج والتقاط الصور والهلال وضحكنا وداعبنا حبايبنا المريخاب، ولانه مصالح الشبكة ( شل شل كب لي جالون) فوق كل شيء.

كان لابد من إعادة توازن المصالح بدعم يرفع من قيمة المريخ فتمت طبخة ( الكبري) في مكاتب بهدية مفضوحة من مجلس الهلال ولسان حالهم بقول لي مجلس المريخ كورة في الوضع الطبيعي مابتغلب وتبقى ظاهرة، نعمل شنو؟.

نعمل شنو؟ ايوااا نلعب في مشاركة اللاعبين ونفتح الباب تتقدم بشكوى في قانونية مشاركتهم، تخسرها تكسبها في إطار الحبكة، في النهاية تكسب الشكوى، وخليها بعد داك تجوط وتبقى قضية والحصل يكون الهلال بطل في الميدان والمريخ بطل من الدكان ده كبري طائر.