وقت نقول ليكم الهلال رجل صالح ـ بتقعدوا تغالطوا.
ووقت يقولوا ليكم نحن أي حاجة عندنا بي نظام ـ ما بترضوا ، وبتعملوا فيها زعلانين.
عندما غادر الروماني ريجكامب وتعاقد مع الترجي التونسي ، زعلنا وغضبنا ، وقلنا الهلال ما ح يجيب أفضل من ريجيكامب.
الهلال تعاقد مع الألماني جوزيف زينباور ـ نسينا ريجكامب. مسحنا رقمه من التلفون ـ أقصد مسحنا صوره وبقينا مركزين مع زينباور ، بقينا مندهشين من الشيء البعمل فيه الألماني دا ـ مسكتنا الخلعة ، تقول أول مرة نشوف لينا مدرب.
قلنا الحمد لله أن ريجكامب غادر.
الهلال رجل صالح.
الهلال باع جان كلود ، نجم الهلال الأول ومعشوق الجماهير ، قلنا تعويض جان كلود مستحيل ، وقنعنا من التعاقد مع جناح في قيمة جان كلود أو قريب منه.
ظهر سامورا وبدد كل مخاوفنا وقال لينا (أنسو).
سامورا في أول مشاركة له مع الهلال توج بلقب هداف بطولة سيكافا. وفي أول مباراة يشرف عليها الألماني زينباور مع الهلال سجل هاتريك.
سامورا سجل ثلاثة أهداف بعد أن شارك في الشوط الثاني.
دي جان كلود ما عملها.
سامورا وضح أنه أعلى تهديفياً من جان كلود ـ ومع أن المقارنات في هذا الوقت ظالمة ، ليس لسامورا ولكن ظالمة لجان كلود ، لأن ما فعله سامورا في بداياته مع الهلال لم يفعله جان كلود في بداياته هو مع الهلال.
المقارنة في البدايات في صالح سامورا.
وأنسو بس.
الهلال رجل صالح.
بدايات غاي بوكاسا مع الهلال كانت مدهشة ، فقد ظهر الهلال بشكل رائع في أول مباراتين في بطولة سيكافا ـ وكلنا تغزلنا في المدرب الكونغولي وسعدنا بما يقدمه.
عندما رحل بوكاسا وقلنا من الصعب أن يجد الهلال لفريق الرديف مدرباً يحمل الإمكانيات الفنية التي يمتلكها غاي بوكاسا.
ناس الهلال أعلنوا عن رحيل غاي بوكاسا وفي اليوم التالي طوالي أعلنوا عن تعاقدهم مع النيجيري أويرورو نور الدين.
مدرب واضح من سيرته أنه أفضل من غاي بوكاسا، والأروع من ذلك أنه مدرب هجومي بشكل أوضح من بوكاسا وتكتيكي من الطراز الأول ، وفوق كل هذا ، هو جاء للفريق الرديف بصورة مباشرة وليس عنده طموح في قيادة الفريق الأول.
أويرورو نور الدين عنده خبرات في المدارس السنية والأكاديميات الرياضية ، وحقق أرقاماً مدهشة مع الأندية التي أشرف عليها في الدوري النيجيري.
المقارنة بين غاي بوكاسا وأويرورو نور الدين في صالح الأخير.
والهلال رجل صالح.
قلنا الحمد لله بوكاسا غادر.
كل ما يرحل أو يغادر مدرب أو لاعب من الهلال يأتي من هو أفضل منه.
أصلو ما عندنا مشكلة.
ما عارف الحاصل شنو ؟ هل نحن ما عندنا عشرة؟
نحن ما عندنا كبير على الهلال ، والقادم دائماً عندنا هو الأفضل.
مقالات ذات صلة
