شاهدتُ فيديو لمدة 7 دقائق و34 ثانية للاعب الهلال القادم بإذن الله “ريشموند بيليه”، وهو فيديو طويل، قدّم فيه بيليه كل “مقدّمات” أغاني محمد وردي الموسيقية، وشفتُ وسمعتُ كل “لَزْمَات” عثمان حسين اللحنية.
لقيتُ فيهُ حمَيّد وقت قال: (تشوفي بعيد بُعد نجمي واشوفو قريب قُرب نضمي).
بِخُشّ ويطلع من وين ما عارف؟.. النظارة لا عرفتُ ألبسها، لا عرفتُ أشربها.. القهوة قدامي لا عرفتُ أشربها لا عرفتُ ألبسها.
الشيء شنو؟
الكهرباء جاءت.
السد دخل الخدمة.
اصرفوا المرتبات، قالوا نزلت.
المدارس فتحت.
بيليه دا يثبتها قَوّن، ما يثبتها قَوّن.
يمر منك قَوّن، ما يمر منك قَوّن.
يقيف قَوّن، يمشي قَوّن.
يلعبها في المرمى قَوّن، يمررها للاعب آخر قَوّن.
لو لعبها في الكشافات الحكم بحسبها قَوّن.
أي حاجة تمر في بالك قَوّن.
أي حاجة عنده قَوّن.
أي كورة قَوّن.
يدخل عليه واحد قَوّن، يدخلوا عليه عشرة قَوّن.
الشيء زي “فأر الماوس” ما بتمسك، وعشان أقنع ناس طبنجة ولا بتشاف ـ يفوت في المدافعين زي الضِلّ.
يتسرب مِتِل الضَو.
مِتِل الريحة.
يتمدد مِتِل الدَرب.
يتوغل في المدافعين مِتِل الحمى.
أنا في البداية شفتُ الجناح الكاميروني وأدهشني لِمَن بي غادي، وهو اللاعب الذي تمنيته في الهلال، لاعب مبالغة، لكن الشيء البعمل فيه “فأر الماوس” دا بخلي المدافعين زي “صواني الخبيز” وقت تجيب ليها ريحة.
يطاقشوا مِتِل الدراويش.
يتخابطوا مِتِل المطر.
المدافع ريحتو تبقى حَرَقْ حَرَقْ.
أكيد “فأر الماوس” دا ح يعمل أزمة في الباكات ـ الأزمة ما ح تكون في الغاز، الأزمة ح تكون في الباكات، والخيش.
الخيش ذنبو شنو؟
وعشان أفرحكم، من خمسة مساءً تاني ما يتلقى ليكم مريخابي حايم، ح يتلموا من بدري بدري.
تاني لا ملعب، لا مكتب… اقنعوا منها ساكت.. ولو سرحتوا لعيبتكم ومشيتوا الدهب أحسن ليكم.
يجر طبنجة يقع الدخيري.
يجر مصعب مكين يقع الدخيري.
يجر دابا سوغوبا يقع الدخيري.
يجر توفيق البرعي يقع الدخيري.
عملتها ظاهرة يا الدخيري.
قريباً ح تسمعوا إن الدخيري عنده “رباط صليبي”.. من الوقيع الكتير.
هو اللعب في المكاتب بجيب الرباط الصليبي؟
الجَنا دا شِن جنسو؟
الشيء شنو؟
لا أقول ليكم سحر، ولا أقول ليكم جان، ولا أقول ليكم عفريت، ولا أقول ليكم خيال علمي.
لا أقول ليكم رهاب، لا أقول ليكم سراب، لا أقول ليكم دخان.
لو شميتوا ليكم ريحة قهوة، دي ما قهوة، دا الشيء البعمل فيه “فأر الماوس” دا.
طبنجة تاني ما بنوم.
الدخيري ما ينوم.. ينوم ليه؟ (دي تاني ح أَمْسِكَهَا ليكم).
الدخيري ما ينوم.. ينوم ليه؟
انتوا يا العليقي “العفاريت” ديل بتجيبوهم من وين؟
العفريت دا لِمُّوهُ عليكم، باقي طَمَنْتَاشَرْتُه دي خلوه يتمها في بري أو في الكلاكلة، أو جيبوه لينا في شندي نشيل حقنا منو (مراسيل).
الولد شافع ساكت.
والله نكرهو بالمراسيل، والموية الباردة.
الولد دا ما تفكوه ـ السماسرة عينهم سوف تكون عليه.
لِمُّوهُ عليكم.
إن شاء الله يا العليقي تنظموا ليه “دورة مدرسية” مخصوص في “الدامر”.
