قالوا ليك (السميل ود جدل)، دخل فيه قلاب فرتكه على 120 قطعة، أصبح مثل الموبايل البكون مربوط بلستك القروش، الناس خمُّوه في بوكسي بتاع لبن، وجروا به على المستشفى.
دخلوا بيه على الدكتور ـ الدكتور أول ما شافه قنع منه، حالته كانت متأخرة شديد، أولاده شافوا الحاج تعبان، والدكتور قنعان، واحد من الجماعة قلبه قوي، قال ليه يا حاج، آخر حاجة بتطلبها شنو؟ أطلب أي حاجة بنجيبها ليك، قول وصيتك، عمك قال ليهم (المهاجم السوبر).
قالوا ليه قلت شنو يا حاج؟
قال ليهم: قلت ليكم: المهاجم السوبر.. المهاجم السوبر يا عليقي.. السوبر.. السوبر يا عليقي.
الدكتور كان مريخابي صعب، عاين فيه سمح، مسك إيدو، ورماها، وقال ليهم الزول دا ميت منذ أربع ساعات.. أدفنوا ساكت.
غايتو جنس حقد!!!
بالمناسبة كشف المريخ لغاية الآن فيه (6) حراس مرمى ـ حالتها دي بدون مهاجم سوبر.. يتوقع يرفعوا عدد الحراس إلى عشرة بعد الإعلان عن المهاجم السوبر.
حراس المريخ الآن على الجمل، أحمد بيتر، عبد الباسط عوض، جرس كافي، محمد أبوجا ،ولادجي إبراهيما سانو.
شكلهم السنة دي ح يلعبوا قوون باك.
الشئ الغريب كشف المريخ فيه عنتر وأسد وطبنجة وكافي وعجب ومكين والجمل والتوزة (وهو نوع قديم من الخناجر اليمنية) وأخذوا أربعة.
المريخ بـ(النمير) ما عمل حاجة، تفتكروا يعملوا حاجة بـ (سهل).
