فرصة لقيت طريقة أتابع كم لقطة من كورة الهلال والجيش الرواندي، في لقطة اتنشرت في صفحة الهلال مكتوب كده، في كم صفحة تحمل اسم الهلال، وياتو صفحة معتمدة رسمية ويديرها النادي ماعندي فكرة.
المهم في لقطة اتعرضت في الصفحة التعليق عليها خاص بأزمة دفاع الهلال أو خلل مستمر في الدفاع، اللقطة ماجابت بداية الباص الاتلعب لمهاجم الجيش الرواندي.
ركزت على لحظة الكورة مشتركة بينه وبين مدافع الهلال كرشوم، الكرة كانت أقرب للمهاجم ونجح أنه يتخلص من كرشوم، وأصبح في حالة انفراد بالحارس مع مطاردة من كرشوم، الحارس طلع وبالبلدي ضيق فرص التهديف المباشر على المهاجم واجبره على التمرير.
قبل ده ظهر في اللقطة لاعب من الجيش ومدافع الهلال عثمان ديوف، المهاجم المستحوذ على الكورة اختار التمرير للاعب المتقدم معه من الناحية اليمني اللي حصل أنه عثمان ديوف كان سابق وقطع أمامه ونجح في أبعاد الكرة في تمركز كأفضل مايكون لمدافع مع هجمة خطيرة كان يمكن ترجمتها لهدف.
اللقطة الاتعرضت في الصفحة المذكورة تمثل استهداف مباشر للاعب ديوف ودي مصيبة طبعاً إنك بتحدد مستويات اللاعبين وفق لمزاج شخصي إنك بتحب اللاعب ده أو بتكرهو وتتصيد ليهو الأخطاء يعني الهجوم كلو على عثمان ديوف اللي أفسد الهجمة، وساهم في الافساد الخروج السليم من الحارس، ومطاردة كرشوم رغم أنه اتخطاه في البداية.
مايهم لو كانت الصفحة دي خاصة بالنادي مؤكد تحتاج وقفة من المسؤولين في النادي ومحاسبة صارمة لأنها بتهدم في الفريق، أما لو كانت تنتحل اسم النادي بدون رقابة وتسترزق من وراه فده موضوع مختلف يعكس حجم الفاضي وعدم السيطرة على محتوى الصفحات البتحمل اسم النادي، والتبليغ بمنع استخدام اسم النادي وشعاره وده ماعندو فرق من قضية الشعار الشهيرة اللي سجلو شخص بإسمه واستفاد من وراه أموال طائلة وعاد للنادي بعد تعب ومساومة ودفع مبلغ كبير.
والكلام ده بيطلع من الاستهداف للاعبين لحق النادي في الاستفادة من موارده والسوشيال ميديا مورد مهم.
