عندي صاحبي بعرف لغة صينية ولغة روسية ولغة هندية ولغة برتغالية ولغة فرنسية والقليل من العربية، لمن يكون عندهُ معلومة ما عاوز يعرفها زول بستعمل إحدى هذه اللغات، خاصة لو في مريخابي معانا.
أمس لاقيت صاحبي بدون مناسبة، قال لي العصفور جنّحوه.
مشيت بحثت في قاموس اللغة الروسية فعلمت أن هذا الكلام بالروسي يعني كانتي مشي الهلال ـ لا أقدر اقول ليكم ماشي لا اقدر أقول ليكم مشى خلاص، لأني ما قاعد أقدر أفرق بين المضارع والماضي في اللغة الروسية.
الكلام ما وقع لي، قال لي (شال هم فرقتك قلبي معاي يا ريتو لو يرحل)، قال لي دي بالصينية معناتها ناس المريخ بمروا بظروف صعبة… وكانتي لاعب ضاغط معاهم.
قلت ليه ظروف أصعب من التمهيدي؟
صاحبي لقى تفاعلي بالموضوع ما بالصورة المطلوبة قال لي العصفور دخل القفص، ثم أضاف الكلام دا بالبرتغالي يعني موضوع كانتي انتهى.
صبرت شوية قال كوما سي دي ناري عضوية كانتي قام جاري.
قلت ليه ودي بي شنو كمان؟
قال لي بالهندية، كانتي اكتسب عضوية الهلال بالانتساب.
قلت ليه بالانتساب!!؟ نحن عاوزنو عديل كدا زي محمد المصطفى وكرشوم.
قال بالفرنسية اقلع، لكن بالتركية وصل عديل.
قلت ليه، شولدقي موستري نول اندري سكاب.
قال لي ودي شنو كمان؟
قلت ليه بالإيطالي يعني ما فاهم أي حاجة من كلامك دا… كمان نحن ما بنفهم لغات!!
قال لي وهو المطلوب، عشان جماعتنا ديل ما ينقشوا حاجة.. بعد شهرين تأكد ح يقولوا ليك كانتي مصاب.
غايتو الحاجة العاوز أقولها ليكم بالساحلية عشان أسهِّلها ليكم، كومو، نوبو ترتر عليقي.
يعني عضوية العليقي فيها خطورة شديدة عليكم ـ كلموا نائب رئيسكم يشوف ليه عضوية بالانتساب، عشان ما في حاجة تفوتكم في البرد دا.
