لامن تمشي ليك لي ناس ويجيبوا ليك عصير، وأنت عامل (ريجيم) أو عندك مرض (السكري) وما بتشرب عصائر (مسكرة)، بتختشي تقول ليهم عامل (ريجيم)، بقولوا عليك فاكيها في نفسه، ولو قلت ليهم عندي (السكري) بقولوا ليك يا زول أشرب ما بعمل ليك حاجة، وفي الحالتين بتجي على صحتك وتجاملهم وتشرب غصباً عنك.
جائزة المباراة في الدوري الرواندي تحت رعاية إحدى شركات الخمور، وقد كنت لا أعرف كيف سوف يتعامل الهلال مع هذه الجائزة اللعينة، وعندما لم يفز أي لاعب من الهلال في مباراته الأولى في الدوري الرواندي بالجائزة، قلت الحمد لله ـ الله شاف الهلال، خاصة إنهم في المريخ احتفلوا بالجائزة عندما فاز بها أحد المحترفين، وتم الاحتفال بذلك مع خلفية إعلانات تضم شركة الخمور الراعية للجائزة.
ولأن الهلال هو نادي التربية اسماً وفعلاً ولا كذب، ولأنه هو نادي الحركة الوطنية ولا لعب ـ نادي الشعب ولا عجب، فقد رفض الهلال الجائزة في المباراة الثانية والتي فاز بها المحترف القيصر إيمانويل فلمو ـ عشان المريخاب ما يلقوا ليهم عذر ويقولوا إن الجائزة في مباراتهم فاز بها (محترف) أجنبي.
القيصر سجل هدفين في مباراة الهلال أمام غاسوقي يوناتيد، الهدف الأول لم أشاهد هدفاً مثله قريباً ـ هدف ذكرني بأهداف يوهانس ووالي الدين، هدف بالذكاء الاصطناعي ـ لكن رفض الجائزة كان أجمل من الهدف الأول، وسنعتبر رفض الجائزة هو الهدف الثالث للقيصر في المباراة ولكن في شباك المريخ، (دا شغل الذكاء الاصطناعي ذاتو)، ربنا يحفظ القيصر ويغطي على جميع لاعبي الهلال ، وأعتقد برفض استلام الجائزة التي ترعاها شركة الخمور سوف يحفظ الله الهلال ولاعبيه.
البركة حلت على الهلال.. وحاجة بسيطة زي دي بتكشف معدنك الحقيقي، والله بسهل عليك.
المفارقة أنّ إعلام المريخ ظل من أغسطس الماضي يتحدث عن القيصر، وعلى أنه (قاصر)، وأكدوا أنّ الهلال مهددٌ بالإبعاد من سيكافا ومن دوري أبطال أفريقيا ـ القاصر يعطي الدروس للجميع ويفوز بجائزة المباراة ويرفض استلام الجائزة.
ويطلع واحد بعد دا ويقول ليك (قاصر).
حالتهُ دي قاصر!!
طيب لو ما قاصر كان طبّق عليهم الحد وجلد رعاة الجائزة.. أو نفذ القانون بحجة الترويج للخمور.
القاصر فات الكبار والقدرو.
الدقيقة 57 شارك فلمو في المباراة.
في الدقيقة 60 سجّل فلمو الهدف الأول في غاسوقي.
في الدقيقة 62 سجّل فلمو الهدف الثاني في غاسوقي.
في الدقيقة 95 سجّل فلمو الهدف الثالث في المريخ برفض جائزة المباراة أو بالحصول عليها أمام لوحة إعلانات تضم مصنع إنتاج خمور.
