ظلّت الحكومة السودانية بدون جدوى، تحرض على العودة الطوعية للعاصمة الخرطوم، بعد أن أجبرت الحرب، الأهالي والسكان على مغادرة بيوتهم بسبب ما تعرضت له العاصمة من نهب وسلب وقتل من قبل قوات الدعم السريع، لتفتقد العاصمة مقومات الحياة من مواصلات وكهرباء ومياه وأمن.. بعد عودة الخرطوم ظل ما شعر به الناس من رهبة وخوف أثناء الحرب حاجزاً يقف بينهم وبين العودة.
الأن يمكننا أن نقول إنّ الهلال تعاقد مع لاعب سوف يجعل العودة الطوعية هي الخيار الوحيد، بل والخيار الجاذب لكل من هجر الخرطوم وغادر منزله.
التعاقد مع لاعب الارتكاز الناميبي أبروسيوس بتيروس، سوف يعيد الكهرباء والماء للخرطوم، سوف تزدهر المواصلات ونرجع نسمع السوق العربي نفر، وسوق ليبيا قيام، حتى كوبري شمبات سوف تعود إليه الحيوية ويرجع حلقة وصل بين أم درمان والخرطوم بحري كما كان في وده.
حفلات نادي الضباط والنادي القبطي والمسرح القومي، سوف تعود أمسياتهم المألوفة.
نجيلة استاد الهلال قالوا من سمعت الخبر براها قامت، والكشافات ولّعت من غير كهرباء ـ عادت الصفوف لاستاد الهلال والشاي رجع للهبهان والقرفة بعد فراق امتد لأكثر من عامين.. والقهوة بقت مظبوطة وطاعمة من غير سكر.
السكر برّه في استاد الهلال.
غايتو بضمن ليكم الجميع سوف يرجع للخرطرم ـ إلا ناس المريخ.
ناس المريخ ح يقولوا في ظروف زي دي ما بنرجع فيها.. والظروف الخايفين منها المريخاب هي ليست قطوعات الكهرباء والماء، وإنما هي تعاقد الهلال مع أبروسيوس بتيروس.
إنتوا ناس الهلال ديل جنوا؟ شوف عيني الحصة الأولى في كل مدارس السودان كانت عن هدف روفا الرابع.
يا العليقي عجِّل لينا بإعادة قيد روفا ـ عاوزين نشغل المكيفات.. عاوزين نقول الكهرباء جاءت.
المطرة دي ناقصها التمديد لعبد الرؤوف يعقوب (روفا).
طبنجة وعوض زايد ومصعب مكين ح يفسخوا عقودهم.
وهيثم كابو ح يقدم استقالته، تاني (الانسحاب) ما بمرقوا مننا.
سلمى سيد استقالت في الوقت المناسب، قبل الانسحاب ما بصبح (عادات وتقاليد).
مسكين رئيس المريخ عمر، جاء للمريخ (النمر) ومرق منه (النمير).
كله من جان كلود.
