عندنا صاحبنا منذ كان في الثانوي العالي، كان بقول عاوز أعرِّس.. لغاية الآن ما عرّس، رغم أنّ أحفاد دفعته عرسوا، وهو لغاية الآن بفتش ليه في خميس فاضي عشان يعرس فيه.
وعند الناس رسخ أن الشخص البقول عاوز يعرِّس ما بعرِّس، والزول البعرِّس، فجأة كدا تسمع بيه عريس، من غير أن يتحدّث عن العرس.
زي تسجيلات الهلال، اللاعب تسمع به بعد أن يتم تسجيله ويدخل القفص الأزرق.
مجلس الهلال بفضل الله، أنجز الموسم الماضي، ثلاث بطولات (الموريتاني والدوري والكأس)، بعد الوصول لربع النهائي أفريقياً.
مجلس الهلال تعاقد مع جهاز فني أجنبي وأبرم صفقاته المحلية والأجنبية، وسجل كرشوم ومحمد المصطفى، والفريق الآن في معسكره المغلق بدار السلام، ما حصل شفنا ليهم صورة، إلا صورة السوباط في المدرعات!! وناس المريخ يا دوب مجلسهم بيجتمع، هم زي حكاية الزول البقول عاوز يعرِّس وما يعرِّس.
يجي رئيس ويفوت رئيس وكل رئيس يوعد بمريخ جديد.. من ونسي لي سهل، يتعدّد الرؤساء والوعد لا يتحقق.
رئيس المريخ الأخير، قال أفرحنا جمهور المريخ، لأننا صرفنا المتأخرات.
الناس في الملعب وهم لغاية الآن في المكتب.
فريق الهلال قطع مرحلة في الإعداد، ومجلس المريخ يجتمع عشان التسجيلات واختيار الجهاز الفني، ومكان المعسكر.
الظاهر المريخ في الموسم الجديد، مع شغل المكاتب دا عاوز يعتمد على (الشكاوى).
الناس زرعوا وحصدوا، ولعيبتهم دخلوا الفورمة، وهم يا دوب كوّنوا لجنة التسجيلات.
التمهيدي السنة دي ريحته ح تكون جاز جاز.
