جبنا (جاز).. جابوا جاز!!
قلبناها (غاز).. قلبوها غاز.
جبنا رئيس من رجال النفط.. جابوا رئيس من رجال النفط.
قبل كدا جبنا صلاح إدريس جابوا جمال الوالي.
نائب الرئيس عندنا مسك القطاع الرياضي.. نائب الرئيس عندهم مسك القطاع الرياضي.
عملنا فضائية، عملوا فضائية.
الحاجة الوحيدة التي خالفونا فيها، عشان ما بقدروا عليها، نحن بنتأهل للمجموعات وهم بطيروا من التمهيدي.
زمن صلاح إدريس كنا نجنس.. يجنسوا، نعير لاعب يعيروا لاعب.. نشطب بيشطبوا.
نجيب البرير رئيساً للقطاع الرياضي يجيبوا أبوجريشة، (نفس الحماس والروح القتالية).
عملنا البرنس (أسطورة).. عملوا العجب أسطورتهم.
خالد عزالدين يحتجب لظروف فنية، مزمل ابوالقاسم تاني يوم يحتجب لظروف فنية.
ديل اتلحونا تلحة، لو الحكم حسب لينا ضربة جزاء أمام العباسية، عاوزين الحكم يحتسب ليهم ضربة جزاء أمام التاج.
قالوا ليك مرة كدا ناس المريخ حاولوا يعملوا ليهم (العليقي) بالذكاء الاصطناعي، عشان يجاروا الهلال، في واحد عاقل منهم قال ليهم انتوا جنيتوا تجيبوا العليقي لي كانتي في حتتو.
نحن كدا ما قادرين ننوم الليل، لو جبتوه لينا في النادي، يمين كشافات استاد المريخ يحولها استاد الهلال، الزول دا عندهُ منطق صعب.
قال ليهم أكون واضح معاكم العليقي دا في الذكاء الاصطناعي ما مضمون.
أها الجاز قدرتوا عليه.
الغاز لحقتونا فيه.
العليقي عاويزن تعملوه عندكم ذكاء اصطناعي.
خدمة العضوية الإلكترونية بالانتساب دي ح تصرفوا معاها كيف؟ الشغل دا كبير ما بتقدروا عليه ـ الموضوع ما موضوع (جاز) ولا (غاز) وتكوين لجنة للعضوية، ولجان عدلية.
حاجاتكم البدائية والتقليدية البتعملوا فيها دي الناس تجاوزتها.
ديل لسه واقفين في البلولة وأزهري وداعة الله.
ناس الهلال جابوا عمار الزبير.. برنس آخر في الإدارة.
الشغل دا كبير، شغل نادي الحركة الوطنية، ونادي الخريجين عبر.
حكمة الله في الحرب دي الهلال عبر.
لو حاولتوا تقلدوا الهلال في موضوع العضوية الإلكترونية دي، جهاز الكمبيوتر بتاعكم ح يضرب، وح يطق الكواريك، وأجهزة هواتفكم الذكية ح تحرق، ومهندس التشغيل سوف يصاب بسكتة قلبية، وح تجيكم رسالة نصية تقول ليكم (دوس على الرقم واحد واطلعوا أولاً من التمهيدي)، شغل الجامعات دا إنتوا بدري عليه ـ لسه ما بقيتوا عليه.
