قريب شهر الكهرباء ماف في محلية الدبة والناس ساكتة ليه ساكتة؟ محتارين؟ مساكين؟ قليلين حيلة؟
التعبير عن حقك في الخدمات مامحتاج انتظار القيادات الكرتونية المالية البلد المشغلوين بالصراعات التافهة ومهمومين بالشكل الاجتماعي أكتر من الكارثة الاجتماعية.
هم أصلاً جزء من تقاطع المصالح الفي المشهد العام هم الاحرص على الصمت وعلى تصوير أنه الناس صابرة وراضية بالمقسوم، المقاومة فعل يومي وناجح بتاكدوا كتير من الأزمات في الخدمات اللي حصلت في مناطق مختلفة القدرة على انتزاع الحقوق، ماهو مايبقى جوع او تجويع حاصل وسلبية كأنه ماف شيء حاصل.
لاحظ مع كل أزمة كهرباء تستمر بينشط توزيع الطاقة الشمسية القصة بقت محفوظة ومعروف جاية من وين ووراها منو؟ حكاية التباهي بالقدرة المالية ممكن ينقذك لكن بكتل غيرك، ومع الانهيار في ناس ماتوا وماتت زراعتهم.
وفي البنتظر الدور وفي الخلاص خانتو قدرتو على الصمود وفي البصمد سنة وفي البصمد تلاتة وخمسة لكن في النهاية كلو حينهار لانه ماف شيء أو حلول تراهن عليها في ظل اللادولة وأي واحد شايل كلاش أو مسنود بيهو هو الحاكم والناهب والمستفيد الأول من الوضع المدمر ده.
رهانك الوحيد على حق في الحياة، وده تقلعوا قلع مابجيبو ليك صحاب ملفحة أو عمة مستمتع بامتيازات حقتك قبلو .. أكتب كورك صرخ أعمل أي حركة رفض بدل الاستسلام والثرثرة في المجالس.