الدوري الرواندي (كاكي أزرق)

بالمفهوم الفرنسي فإن ما يفعله الهلال هو شيء فوق الخيال (سيهْ أَنْكغوايابْل).

دي ترجمتها زي الطحينية بالزبادي.

بالإنجليزي فإن الهلال يفعل في شيء خرافي (ذِس إِز أوسَم).

دي زي البسبوسة بالسمنة.

بالهندي فإن ذلك هو الجنون نفسه يِهْ خُودْ إِكْ بَاغَلْبَانْ هَيْ).

عجوة معطونة في عسل.

بالصيني الهلال بالغ معانا (جِهْ تَايْ كْوَا جَانْغ لَه).

دي باسطة عديل كدا.

باللغة البرازيلية فإن ذلك هو السحر كله (إيزو إيه مَاجيكو!).

فطير باللبن!!

بالإسبانية فذلك هو العجب (إستو إس أُونا مارافيا!).

يا طبنجة أنت البقعدك مع الناس ديل شنو؟ يا زول شوف مصلحتك واتخارج من الوصافة دي.

بالعربي أحسن يا ناس المريخ تشوفوا ليكم بلداً.

تتخيلوا الهلال شارك في الدوري الرواندي كضيف ـ ذهب إلى هناك بسبب ظروف الحرب وعدم استقرار البلاد فحصد الهلال كل الجوائز.

فاز الهلال بالدوري قبل ثلاث جولات من نهاية الدوري.

الهلال حقق الدوري الرواندي على حساب الجيش الرواندي والبوليس الرواندي ـ ما قدروا يقولوا أي حاجة.

سجل هجوم الهلال أهدافاً جعلت الأزرق صاحب أفضل هجوم في الدوري بفارق عريض ـ اسكت عد.

الموضوع عاوز ليه شاي بي لبن.

فاز لاعب الهلال الليبيري فولمو بجائزة أفضل لاعب شاب في الدوري.

فاز لاعب الهلال البروندي جان كلود بجائزة أفضل لاعب في الدوري.

فاز مدرب الهلال الروماني ريجكامب بجائزة أفضل مدرب في الدوري.

أكثر من ثلث التشكيلة المثالية للدوري الرواندي من الهلال.

انتوا ناس المريخ ديل في رواندا كانوا في(سياحة) أم (علاج)؟

أنا أول مرة أشوف لي ضيف بقوة العين دي.

ضيف لملم كل شيء.

فريق يشارك في الدوري كضيف ويحقق كل هذه الجوائز، رغم أن الفريق الذي شارك معنا بنفس الصفة والظروف في موريتانيا حقق المركز السادس بفارق 24 نقطة من الهلال وفي رواندا حقق المركز الثالث بفارق 16 نقطة عن الهلال وفي الدوريين كان الهلال بطلاً للدوري مع الاحتفاظ بالدوري السوداني في آخر خمسة مواسم.

الكلام دا كله حققه الهلال مع ظروف الحرب وعدم الاستقرار.

الدوري الرواندي (كاكي أزرق).

يا ربي الهلال اشترى سيكافا بالدوري الرواندي؟