المريخاب حالتهم صعبة شديدة، ما عارفين يعملوا شنو؟
يتصرفوا كيف؟
مريخابي قال لي والله أنا قاعد على الهيشة، التلفون في الشاحن لو سمعت رنة رسالة ساكت أقول ديل ناس الهلال جابوا ليهم (كارثة) جديدة علينا.
قال لي نغمة الرسالة وقت أسمعها كأني وقعت فيني صاقعة.
المريخابي اعترف لي وقال لي أنا قاعد على أعصابي من يوم (مسمار فولمو) الأكل ما ضقت ليه طعماً والموية بقت ما بتتبلع لي.. المريخابي قال بقى يقيس الضغط في اليوم 21 مرة والسكري 17 مرة وقال لي كلاماً تاني ما عاوز أكتبو عشان ما أشفقكم على إخوانكم المريخاب.
الزول المريخابي دا قال لي أنا هسه ما عارف أعمل كيف؟ .. لو جان كلود رحل عن الهلال سوف يعود بيعه للهلال بي 5 مليون دولار ودي الهلال ما بخلي ليه بيها موهبة حائمة في أفريقيا.. ولو كمان جان كلود استمر مع الهلال برضو مشكلة.
قلت ليه يعني أنت عاوز شنو؟ عاوز جان كلود يقعد أم يمشي؟
أفضل ليكم رصيد الهلال يرتفع في الدولار أم في الأهداف؟
قال لي والله في الحالتين أنا الضائع.. نحن البلد دي خليناها ليكم، وتاني ما أسمع زول يقول (العودة الطوعية).
مقالات ذات صلة
