إبراهيم عوض عنده أغنية أسمها (المصير) بقول فيها (ليه بنهرب من مصيرنا نقضي أيامنا في عذاب) ، انظر للصورة.
وعثمان حسين عنده أغنية برضو أسمها (المصير) بقول فيها (قبلك أنت عشت قصة حب قاسية.. لسه مازالت في قلبي ذكرياتها المرة باقية)، انظر للصورة.
مصير إبراهيم عوض من كلمات سيف الدسوقي وألحان عبداللطيف خضر ، ومصير عثمان حسين من كلمات حسين بازرعة وألحان عثمان حسين.
الطيب عبدالله غنى للمصير من كلماته وألحانه (يا المصيرك تنجرح بالسلاح البيه مرة جرحتني) ، أظن كدا الصورة وقعت ليكم، اسألوا طبنجة.
أنتوا يا العليقي الجماعة البجدعوا في (الباكات) ديل زي شنط المدرسة بتجيبوهم من وين؟
يمين يجدعوا فيهم متل (التيراب).
الشيء شنو؟
نقول بهدلة!!؟
نقول بشتنة!!؟
نقول تحديد (مصير)!!؟
أنا متأكد في ناس شالوا من هسه هم يوم 12 / 12.
غايتو يا طبنجة أنت لو مفتح تشيل (دفتر العيادة) من شهر أكتوبر.. عشان ما تكون ظاهرة.
حدد مصيرك يا كابتن واتخارج من بدري… الهلال جاب ليه لاعب اسمه (سامورا) ، أي باك قابله ، قال ليه: امشي جيب ولي أمرك وتعال.
نحن اقتنعنا ، البقنع الباكات ديل أن جان كلود مشى من الهلال منو؟
عايشين في نفس الدور… يتجدعوا زي (التبش).
الباكات ديل بقوا يتجدعوا (عادات وتقاليد).
طبنجة معذور.
error: النسخ ممنوع
