تاني وتالت وعاشر ماف اي جهة حاليا في المريخ عندها حق إصدار قرار في اي شيء يتعلق بنادي المريخ، الناس القاعدين ومسمنهم لجنة تسيير ديل ماعندهم صفة تخليهم يطرحوا تحويل النادي لشركة مساهمة اللي هو ده المدخل لبيع النادي لشخصيات بعينها، فالقرار زي قرارات سابقة يبلو ويشربوا مويتو.
النظام الأساسي الأصلي او المتطابق مع الاتحاد الدولي والاتحاد الافريقي والاتحاد السوداني، في حال حدوث فراغ إداري يدير النادي الأمين العام ( موظف) وشغله الأساسي التجهيز لإنعاقد جمعية عمومية لانتخاب مجلس إدارة جديد، ماف حاجة اسمها لجنة تسيير ولو مكتوب في نظام اساسي فهي باطلة قانونا وتنسف النظام الأساسي، ده في حالات غير الوضع الحالي البيعشو المريخ واللي ورط فيهو الاتحاد السوداني النادي باعتماد مجالس غير شرعية هو نفسه الاتحاد لم يستطع التعامل معها بصورة رسمية والقصة معروفة من مجلس ادم سوداكال المجلس الوحيد اللي يملك شرعية والوحيد بطرفه قرارات دولية وقارية تؤكد على هذه الشرعية والوحيد اللي يستطيع واستطاع مخاطبة المحلي و الاتحاد القاري والدولي ولجانه والمحكمة الرياضية، اما البقية من مجالس سابقة حازم، ابوجيبين، النمير، واللجنة الحالية، فشلوا في كتابة خطاب واحد، للجهات المذكورة شغالين لف ودوران مثلا زي اتهام معتصم جعفر باستلام دولارت تخص النادي من حوافز كاف للاندية، يعني مجلس ماقادر يخاطب الاتحادالافريقي يقول لي ادينا قروشنا العندك، ومنه يعرف القروش اتحولت لمعتصم ولا لا وده اقصر طريق طبعا لمعرفة الحقيقة حقك لو عندك حق عند الاتحاد الافريقي وهو البيكشف الفساد لو فعلا في فساد ، لكن اهو اختاروا حيطة معتصم القصيرة، باختصار لانهم مافيشين عدم ماعندهم شرعية ولا وجود لهم.
اما حكاية شركة المساهمة حلم الراسمالية الطفيلية امتلاك الأندية الجماهيرية فده موضوع نجيهو ع رواقه.
