نحن كل سنة في هذه الحالة، نفس الجعريبة والبكاء والظروف.. بيت البكاء في كل عام في نفس الحتة.
نفس الشارع والعنوان.
البيت نفس البيت.. والمرحوم نفس المرحوم والبيان نفس البيان.
في أندية التأهل لمرحلة المجموعات بقى عندها “عادات وتقاليد”، لا إنجاز في ذلك؛ فهذا أمرٌ طبيعيّ بالنسبة للهلال… الهلال يتصدر مجموعته “عادي”.. وفي أندية الخروج من مرحلة التمهيدي بقى برضو عندها “عادات وتقاليد”.
حاجة راسخة وثابتة ـ لا فيها دخيري ولا يلعبون.
عادي جداً.
كل سنة نحن في نفس الحالة ـ المريخ سوف يغير المدرب، في الموسم الماضي غيّروا المجلس وبقى الحال على ما هو عليه.
ح تسمعوا كتير.. المريخ في مرحلة بناء البديل الشرعي لـ(نهواه في كل الظروف).. ح يقولوا ليكم (أي دمعة حزن لا لا) لكن بطريقة تانية.
ح نسمع أسطوانة دعم المجلس، والمجلس ما قصر، والمجلس نفسه سوف يصدر بياناً ـ نفس بيان الموسم السابق والموسم القبل ذلك، تتغير المجالس والبيان واحد.
المجلس بفتكر أنه عندما يصدر بياناً يتحمل فيه المسؤولية فذلك يعني أنه مجلس محترم.
نحن في المريخ إخوة.
زمان كانوا بقولوا المريخ ما فيه استقرار وكانوا يقولوا الهلال بي جازه.. جابوا ليكم نفس الجاز والحال في حالهُ.
مشكلتكم شنو؟ مجلس بتكون من رؤساء أكبر الشركات ومن لواءات ـ أقل واحد منهم عنده سبعة مصانع.
زمان كانوا بقولوا آدم سوداكال ـ هسه بعد أي خروج للمريخ يقولوا لازم ندعم المجلس.. المجلس ما قصّر.
المجلس محترم.. بطلع من التمهيدي ورأسه مرفوع.
فعلاً المجلس ما قصّر في الصور ـ صور طه حسين التى نشرت له في صفحة المريخ لأسطورة المريخ حامد بريمة ما نشرت.
ولا فيصل العجب.
واللواء طيار محمد عظيم ينضم للبعثة.. وعلي جعفر شغال تصريحات.. مفتكر التأهل ممكن أن يكون بالمكتب.
وفي النهاية مجلس المريخ يصدر بياناً يعتذر فيه للجماهير.. بيان نفس البيان السابق.
الحقيقة التى يجب أن تعلموها هو أن شغل الدخيري ما بودي لي قدام.
الدخيري حدو معاكم أنكم تشاركوا في دوري أبطال أفريقيا.
دي نتيجة اللعب في المكاتب، لو بتلعبوا في الملاعب كان اتأهلتوا.
ناقصكم شنو؟
مجلس من أكبر شركات البلد، ورتب عسكرية رفيعة وجاز عالي الجودة وسكر ودقيق وعدس.
مالكم؟
خمس جنسيات وعشرين محترفاً أجنبياً وفريق في كيجالي وفريق في الإسماعيلية.
مشكلتكم شنو؟
جابوا ليكم نفس الجاز.
يعملوا ليكم شنو؟
حاولوا غيِّروا الطرمبة البتكبوا منها.. يتخيل لي المشكلة في الطرمبة.
حيقولوا ليكم سوف نرتب الأوضاع وح يقولوا ليكم المجلس في حالة عمل مستمر.
وحالة انعقاد.
وفي النهاية يشيلوا المدرب والحال في حالهُ.
مرة مدرب برازيلي.
ومرة مدرب انجليزي.
مرة مدرب صربي.
ومرة مدرب إيطالي.
ومرة مدرب مصري.
ومرة مدرب صربي تاني.
جربتوا أي حاجة.
قلت ليكم قبل كدا ـ كدا جربوا “نظام الطيبات” يمكن ينفع معاكم.
فولمو يقول ليكم : يا دخيري القوم.
