أنا مقتنع أنه في أشياء يجب ألا نصبر عليها.
لا تنتظروا نتائج مختلفة أو جديدة من تجارب يقوم بها نفس الناس بنفس المعطيات.
نحن جزء من الكارثة .. لأننا أرتضينا بهذا الاتحاد.
الفساد لا ينتج غير الهزائم ، حتى وإن كانت هنالك انتصارات وبطولات.
نحن ممكن ننتصر صدفة.
وممكن ننتصر ببركة دعاء الوالدين.
وممكن ننتصر بحسن النوايا وفرح الغلابة.
ممكن ننتصر بالموهبة والمهارة مرة ـ لكن حتى الموهبة والمهارة تحتاج إلى إدارة ـ بقى في حاجة اسمها إدارة الموهبة ، قبل إدارة المنظومة.
ممكن نتقدم.
ونصدق روحنا.
ونفرح…
ممكن.. الكورة فيها مثل هذه الأشياء.
عنتر قتله أعمى.
وفي الحياة عامة ـ ممكن الفاسد تلقاه قدام…
وممكن نصدق من يكذب ونحن عارفين أنه بيكذب..
ممكن زول ما شاطر ، تلقاه يحقق في نتائج لا يحققها الأذكياء.
ممكن أية حاجة تحصل..
الله يمهل ولا يهمل..
ممكن نتفاصح وندق صدرنا ، ونحن ما عندنا أي حاجة.
وممكن ننافس بدون مقومات…
ممكن الجاهل يتفوق عندنا على العالم.
نحن برانا بنقول خذ الحكمة من أفواه المجانين .. نحن انتهينا بهذا الكلام من العقلاء.
نحن ممكن ننافس عندما يكون التنافس في هذا السباق لا يعتمد على الدراسة والاجتهاد والتخطيط.
ممكن نفوز إذا كان منافسينا يعاني من نفس مشاكلنا ..
لكن إذا كان الموضوع فيه ذكاء ودعم لوجستي وتخطيط استراتيجي فلن يكون لنا نصيب.
نحن بنغش نفسنا .. عشان نفرح ..
بنمسك في أي فرحة ونعملها موضوع ، عشان ظروف الناس..
وظروف البلد .. رغم أننا نحن من صنعنا هذه الظروف.. يعني ظروفك لا يمكن أن تكون عذراً لك.
أي زول بظروفه.
الحياة بقت صعبة ، ما عاوزين نصعبها على الناس اكتر من كدا…
لكن السكوت أصعب.
ممكن نراهن على بكرة ، ثقة في الله .. ما ثقة في زول.. لكن لازم نعرف اننا إذا لم نغير واقعنا لن نتغير.
معقولة بس عاوزين نغير الواقع ، بتغيير الستائر .. أو تغيير الكفر.
لازم نتحرك ونعمل حاجة. . ما نقعد ننتظر الأشياء تتغير من تلقاء نفسها.
في وجود اتحاد كرة القدم هذا أي كوارث تحدث بتبقى ما غريبة.
هذه نتائج طبيعية ..
ما تغشوا روحكم..
نحن عندنا مشاكل كتيرة ـ حتى على مستوى الإعلام عندنا مشاكل…لكن يبقى هذا الاتحاد هو المشكلة الأكبر في كرة القدم السودانية.
إذا كان ما في انضباط وما في التزام ، فإن كل ما تحققه بالفوضى زائل ولا قيمة له..
إذا كنا ما بنحترم القوانين واللوائح ، لا تنتظر أن تتقدم..
الحقيقة أن السودان هذا يحتاج إلى جيل جديد … جيل جديد في كل المجالات .. ناس تفكر بطريقة مختلفة .. ناس عندها وطنية .. وبتقدر العلم والخبرة والموهبة.
بالنفاق ممكن تبني ليك عمارة أو تعمل ليك بيت .. لكن بالنفاق لن تبني وطن.
الاوطان تبنى بالعلم والإخلاص والوفاء والعدل…
بقى في انتهازية وفساد ولخبطة وأي زول بفكر في روحي…
البلد دي فيها مليون معتصم جعفر… ومليون أسامة عطا المنان … المشكلة ليس في معتصم أو أسامة وحدهما .. لو عاوزين تصلحوا ما تشيلوا صفر واحد من المليون .. شيلوا ستة اصفار .. شيلوا الرقم كله.
